රාජපක්ෂලාගේ ජිනීවා මැජික් අතරේ විශ්වීය අධිකරණ බලය යටතේ නඩු සූදානම..! ජිනීවා වල ඇත්තටම මොකද වෙන්නෙ..?
සුනන්ද දේශප්‍රිය ජිනීවා සිට ලියයි
https://www.lankaenews.com/news/11812/si
What-happened-in-Geneva-Sunanda-Deshapriya-LeN-28.02.2021
(ලංකා ඊ නිව්ස් -2021.පෙබ.28, ප.ව.4.45) රාජපක්ෂලාට ජීනීවා උණ සෑදෙන්නේ ටිකක් පරක්කු වෙලාය. මුලින් කරන්නේ කයිවාරු ගැසීමයි. දෙවනුව නිහඬ වෙති. තෙවනුව මැජික් එකක් දෙකක් අතහරියි. යළි සුපුරුදු රැවටිල්ල පටන් ගනිති.
එනයින්ම මානව හිමිකම් මහ කොමසාරිස්වරියගේ ශ්‍රී ලංකාව පිළබඳ වාර්තාව කියන්නේ ලංකාණ්ඩු වසර 11 ක් පුරා එක්සත් ජාතීන්ට සහ මානව හිමිකම් කවුන්සිලයට දෙන ලද පොරොන්දු ඉටු කර නැති බවයි.
දිනේශ් ගුණවර්ධන කියන දේ විශ්වාස කරයිද?
ඒ ඉතිහාසය පටන් ගන්නේ 2009 වසරෙහි ශ්‍රී ලංකාන්ඩුව විසින්ම සහාය දී සම්මත කරගත් යෝජනාවේ සිටය. රාජපක්ෂලා රට කරවූ එදා දුන් පොරොන්දුවත් තවම ඉටු කර නැත. මහින්ද රාජපක්ෂ බැංකි මූන් සමඟ 2009 මැයි 25 දා අත්සන් කළ ඒකාබද්ධ ප්‍රකාශනයේ එකඟ වූ කරුණුවත් ක්‍රියාත්මක කර නැත. මහින්ද රාජපක්ෂ විසින්ම පත් කරන ලද උගත් පාඩම් කොමිසමේ සහ පරණගම කොමිසමේ නිර්දේශ කලු පැහැතිවන තරමටම පුස් කා තිබේ.
2015 යෝජනාවේ එකඟතාවයක් අනුව පිහිටුවන ලද අතුරුදහන් වූ තැනැත්තන් පිළිබඳ කාර්යාලය (OMP) එළෙසම පවත්වා ගෙන යන බව විදේශ ඇමැති දිනේශ් ගුණවර්ධන ජිනීවාවලට පොරොන්දු වෙයි. ඒ පිටම දිනේශ්ට වැඩි බලකාරයකු වන ගෝඨා ගජයකු වන සරත් විරසේකර පුවත්පතකට කියන්නේ OMP ය අහෝසි කළ යුතු බවයි. එවිට මානව හිමිකම් කවුන්සිලය දිනේශ් ගුණවර්ධන කියන දේ විශ්වාස කරයිද?
ශ්‍රී ලංකාව පිළිබඳ සාකච්ජාවේදී ඉන්දියාව කෙලින්ම 13 වන සංශෝධනය යටතේ පළාත් සභා පැවැත්විය යුතු බව කීවේය. ශ්‍රී ලංකාව සම්බන්ධයෙන් සිය ප්‍රතිපත්තියේ එක් කොටසක් වන්නේ යුක්තිය, සාමය, ගරුත්වය මත ශ්‍රී ලංකාවේ දෙමළ ජනයාගේ ප්‍රශ්ණ විසඳීම බවද කීවේය.
ශ්‍රී ලංකාව වෙනුවෙන් මානව හිමිකම් කවුන්සිලය ඇමැතීමට පෙර ආශීර්වාද ලබා ගැනීම සඳහා විදේශ ඇමැති දිනේශ් ගියේ 13 වන සංශෝධනය අහෝසි කිරීම වෙනුවෙන් පමණක් නොව දෙමළ විරෝධී දේශපාලනයක යෙදෙන ගෙවිඳු කුමාරතුංග සහ ගුණදාස අමරසේකර සමඟ 83 කළු ජූලියේදී පිස්තෝලයත් ඉනේ ගසාගෙන කොළඹ සැරිසැරූ දාමරික චීවරධාරියකු වූ ඇල්ලේ ගුණවංශ වෙතය.
එම ආශීර්වාදයට අනුකූලව දිනේශ් ගුණවර්ධන මානව හිමිකම් මහ කොමසාරිස්වරියගේ වාර්තාව සහමුලින්ම ප්‍රතික්ෂේප කරමින් ගැටුම්කාරී ආකල්පයක් ගත්තේය. ශ්‍රී ලංකාවේ යුද්ධ කාලීන මානව හිමිකම් කෙළෙසීම් ඔහු ප්‍රතික්ෂේප කළේය.
ඉන්දියාවට දුන් පණිවිඩය "බම්බු ගහ ගනින්"
සිය සගයින් සහ දෙමළ ජනතාවගේ ප්‍රශ්ණ ගැන වචනයක්වත් නොකීම මගින් ඉන්දියාවට දිනේශ් ගුණවර්ධන දුන් පනිවිඩය “බම්බු ගහ ගනින්” යන්නය. ඒ සමඟම අර සරත් වීරසේකරම ඉංග්‍රිසි පුවත්පතකට කියන්නේ 13වන සංශෝධනය සහ පලාත් සභා නව ව්‍යාවස්ථාව යටතේ අහෝසි කරන බවයි.
ලංකාවේදී ෆේල් රාජපක්ෂලා අන්තර්ජාතික වශයෙන් කුජීත වන්නේ මෙවැනි 'පන් ගෝට්' නිසාය.
කොවිඩ් වසංගතයට දැන් අවුරුද්දකට වැඩිය. ලංකාවෙහි වසංගතය ඇරඹුණු පසුගිය අප්‍රේල් මාසයේ සිටම රාජපක්ෂලා ගෝලීය වසංගතය යොදා ගත්තේ බය ගැන්වීමට ය. නැතිනම් මර්දනයට ය. කොවිඩ් නීති උල්ලංඝනය කළැයි අත් අඩංගුවට ගන්නා ලද පිරිස සමහර විට ලක්ෂයකට ආසන්න විය හැකිය.
ඊටත් වඩා රාජපක්ෂලා කොවිඩ් මරණ භූමිදානය නොකළ යුතුයැයි අපූරු තීරණයක් ගත්තේය. එමගින් කොවිඩ් මරණ අරභයා ශ්‍රී ලංකාව ලෝකයේ විද්‍යාව වෙනුවට ජාතිවාදයට මුල්තැන දෙන ලෝකයේ එකම රට බවට පත්විය.
'ඉස්ලාමීය සහයෝගිතා සංවිධානය' සහ ඛාන්..
ජිනීවා උණ දැනුන ගමන් ලොකු රාජපක්ෂ භූමිදානයට අවසර දෙන බව කීවේය. නමුත් ඔහු ගම්මන්පිල වැනි ගොජර ජාතිවාදීන්ට යටවිය. ගම්මන්පිල ගේ හිසට කකුල තබා ඉම්රාන් ඛාන් ආවේය. රාජපක්ෂ දෙබෑයන්ම “හා අපි භූමිදානයට අවසර දෙන්නම්” කියා ඛාන්ට කීවේ ජිනීවා දෙස බලා ගෙනය.
නමුත් ඛාන් ජිනීවාහි සිය තානාපතිවරයා ලවා, ශ්‍රී ලංකාව පිළිබඳ වාර්තාව සාකච්ජාවට ගත් පසුගිය බ්‍රහස්පතින්දා රාජපක්ෂලාට වෙඩි මුරයක් තිබ්බේය. ඔහු කීවේ, "භූමිදානයට අවසර දීමට ගෙන ඇති තීරණය ලංකාන්ඩුව විසින් වහාම ක්‍රියාත්මක කළ යුතු" බවයි.
ඊටත් කලින් ජිනීවා රැස්වීමේ ආරම්භක දිනය වූ 22 දාම රටවල් 54 ක සාමාජිකත්වයක් ඇති 'ඉස්ලාමීය සහයෝගිතා සංවිධානය' රාජපක්ෂලාට අනතුරු හැඟවීම කර තිබුණි. එම සංවිධානයේ මහ ලේකම් කවුන්සිලය අමතා කිවේ, 'ශ්‍රී ලංකාව මුස්ලිම් ජනයාගේ ආගමික අයිතිය පැහැර ගෙන තිබීම ඉවසිය නොහැකි දෙයක්' බවයි.
ලංකාවේ මුස්ලිම් මිනිස්සු මාස දහයක් පුරා ගෙන ගිය සාමකාමී සිත්පාරවන උද්ඝෝෂන පයිසෙකට නොසැළකූ රාජපක්ෂලාට දෙවි සිහි වී 24 වනදාම ගැසට්ටුව ගැසූහ. දැන් භුමිදානයට විරුද්ධව කතා පැවැත් වූ බයි සේනාව නිහඬය. ඒ ජීනිවා නැගිට ඇති නිසාය.
ඒ විතරක්මද නොවේ. ඒ ඉරණම් සහගත 24 දාම රාජපක්ෂලා ජනාධිපති රාජපක්ෂ අද හෙටම අතුරුදහන් වූ සිය දරුවන්ගේ තොරතුරු ඉල්ලා දින 1500ක් තරම් උද්ඝෝෂනයේ යෙදී සිටින දෙමළ මව්වරු හමුවන්නට යන බවද කීවේ ය. ඒ ද ලංකාවේ පත්තරයතට නොවේ. ඉන්දියාවේ හින්දු පත්තරයට ය.
අදහා ගැනීමට බැරි චන්ද්‍රප්‍රේමගේ කතාව..
ශ්‍රී ලංකාව පිළිබඳ වාර්තාව සාකච්ජාවට ගැනීමට පෙර මහ කොමසාරිස්වරිය විසින් විසින් ඉදිරිපත් කරන ලද ඊශ්‍රාලය විසින් අල්ලාගෙන සිටින පලස්තීන භූමියෙහි මානව හිමිකම් කෙළෙසීම් පිළිබඳ වාර්තාව සාකච්ජාවට ගැනුණි. එම වාර්තාව සංවර්ධනය වන රටවල් මෙන්ම සංවර්ධිත රටවලද පැසසීමට ලක්වූ නමුත් රාජපක්ෂලා ගේ නියෝජිතයා කටක් ඇරියේවත් නැත.
ඒ වෙනුවට මේ අතරවාරයේම සාකච්ජාවට ගැනුණේ එරිත්‍රියාව ගැන මහ කොමසාරිස්වරිය විසින් ඉදිරිපත් කරන ලද වාර්තාවයි. එවිට ශ්‍රී ලංකා නියෝජිත සී.ඒ. චන්ද්‍රප්‍රේම කට ඇරියේය. ඔහු කී දේ අදහා ගැනීමට බැරි තරම්ය.
එරිත්‍රියාවෙහි දශක දෙකකටත් වඩා පවතින්නේ තනි පක්ෂයක ඒකාධිපති පාලනයකි. වසය 18 ට වැඩි තරුණ තරුණියන් බලහත්කාර යුද සේවයට බඳවා ගන්නා අතර යුද සේවය නිමා කැරෙන සීමාවක් නැත. විටෙක එය වසර 18 ක් තරම් වෙයි. පුද්ගලික අංශයට ජනමාධ්‍ය තහනම්ය. දේශපාලන සිරකරුවන් දහස් ගණනිනි.
එවැනි රටක මානව හිමිකම් ගැන කතා කිරීම වරදක් බව කී ශ්‍රී ලංකාව ඊටත් එපිටට ගොස් කියා සිටියේ මානව හිමිකම් කවුන්සිලය අදාළ රටෙහි අනුමැතිය නැතිව කිසිම රටක මානව හිමිකම් ගැන කතා කළ නොයුතු බවයි.
රාජපක්ෂලාගේ මෙම න්‍යායට අනුව මියන්මාරයේ මානව හිමිකම් ගැන කතා කිරීමට එරට නීති විරෝධී යුධ ආන්ඩුවෙන් අවසර ගත යුතුය. ඊශ්‍රායලය පලස්තීන ජනයාට කරන දුෂ්ඨ සැළකීම් ගැන කතා කිරීමට ඊශ්‍රායලයෙන් අවසර ගත යුතුය.
ඒකාධිපතියන්ගේ කණට මී පැනි..
තවද දිනේශ් ගුණවර්ධන කවුන්සිලය අමතා කළ කතාව සමාන වූයේ ඊශ්‍රාලය වෙනුවෙන් පලස්තීනයට විරුද්ධව දක්වන ලද අදහස්වලට ය. මහ කොමසාරිස්වරියට බැට දීමටය.
රාජපක්ෂවරුන්ගේ මෙම න්‍යායට සහාය දෙමින් අද ලොව පවතින ඒකාධිපති සහ තනි පක්ෂ රාජ්‍යයන් පෙළ ගැසී පැමිණීම පුදුමයක්ද? චන්ද්‍රප්‍රේමගේ කතාව උතුරු කොරියානු ඒකාධිපතියාගේ කණට මී පැනි වන්නට ඇත. උතුරු කොරියාවද පසුගිය 25 දා මානව හිමිකම් කවුන්සිලයේ දී ශ්‍රී ලංකාවට පක්ෂව කතා කළේය.
ශ්‍රී ලංකාවට පක්ෂව කතා කළ මේ ලැයිස්තුව බලන්න. උතුරු කොරියාව, වියට්නාමය, ළාඕසය, කාම්බෝජය, බෙලරුස්, පිලිපීනය, සිරියාව, ඉරානය, පකිස්තානය, කියුබාව, නිකරගුවාව, වෙනිසියුලාව, ඊජිප්තුව, නේපාලය, මාලදිවයින, අසර්බයිජානය. චීනය, රුසියාව. මෙම රටවල් අතර නමට හෝ බහු පක්ෂ පාලනයක් ඇත්තේ රටවල් හතරක පමණි. ඊජිප්තුව, ඉරානය, වෙනිසියුලාව, සිරියාව, බෙලරුස් යනු අද ලෝකයේ සිය ජනයාට දුෂ්ඨතම ලෙස හිරිහැර කරන රටවල්ය.
ආසියා පැසිෆික් කලාපයේ ඇති මලයාසියාව, ඉන්දුනීසියාව, නවසීලන්තය වැනි රටවල් කිසිවක් ශ්‍රී ලංකාවට පක්ෂව කතා කළේ නැත. මහ කොමසාරිස්වරියගේ වාර්තාවට පක්ෂව ඇමෙරිකාව, බටහිර යුරෝපීය රටවල්, බ්‍රිතාන්‍ය, අයර්ලන්තය සහ ඕස්ට්‍රේලියාව අදහස් දැක්වූහ.
කවුන්සිලයේ ශ්‍රී ලංකාව පිලිබඳ ක්‍රියාකාරී කන්ඩායමට දැන් අප්‍රිකානු රටක් වන මලාවිය ද එක්වී තිබේ.
පල්ල ගිය බාල්දියකින් වතුර ඇදීම...
බටහිර රටවල් එල්ටීටීඊය විසින් කරන ලද අපරාධ ගැන නිහඬ බවට ආන්ඩුව ගෙන යන ප්‍රචාරයද පල්ල ගිය බාල්දියකින් වතුර ඇදීම වැන්නකි. ශ්‍රී ලංකාව සම්බන්ධ සැම යෝජනාවකම සෑම පාර්ශවයකින්ම කරන ලදැයි කියන හිමිකම් කෙළසීම් සම්බන්ධයෙන් පියවර ගත යුතු යැයි සඳහන් වන බව කවුන්සිලයේ සමාජික රටවල් දනිති.
අද රාජපක්ෂ සුරතලුන් වන එකල එල්ටීටීඊ නායකයින් වූ කරුණා අම්මාන් සහ පිල්ලෙයාන් යටතෙහි ළමා සොල්දාදුවන් බඳවා ගැනීම ගැන මානව හිමිකම් කවුන්සිලයේ වාර්තාවක් ඉදිරිපත් කරන ලද්දේ එක්සත් ජාතීන්ගේ සංවිධානයේ නියෝජ්‍ය ලේකම්වරියක ද වූ සන්නද්ධ අරගලය තුළ ළමා සොල්දාදුවන් පිළිබඳ සොයා බැලූ ආචාර්ය රධිකා කුමාරස්වාමි විසිනි.
ශ්‍රී ලංකාවේ මානව හිමිකම් කෙළෙසීම් පිළිබඳව 2014 වර්ෂයේ මහ කොමසාරිස් කාර්යාලය ඉදිරිපත් කරන ලද විමර්ශන වාර්තාවෙහි එල්ටීටීඊ ය විසින් කරන ලදැයි කියැවෙන යුද අපරාධ පිළිබඳව සඳහන් වෙයි.
විශ්වීය අධිකරණ බලය යටතේ නඩු සඳහා සූදානම්..
ලක්ෂ්මන් කදිරගාමර් ඝාතනය සම්බන්ධයෙන් නඩු පවරා දඬුවම් කරන ලද එකම නඩුව වන්නේ විශ්වීය අධිකරණ බලය යටතේ ජර්මනියෙහි පවරන ලද නඩුවයි. 2018 වර්ෂයෙහි එල්ටීටීඊ සාමාජිකයකු එම නඩුවෙන් වැරදිකරුවකු වී සිරගත විය.
24 වන දින පැවැති ශ්‍රී ලංකාව පිළිබඳ සාකච්ජාවෙහිදී ජර්මනිය ප්‍රශ්ණයක් මතු කළේ ය. එනම් අන් රටවලදි ශ්‍රී ලංකාවේ යුද අපරාධ සම්බන්ධයෙන් නඩු පවරන විට ලබා දිය හැකි සහාය තුමක්ද යන්නයි. එයට පිළතුරු දෙමින් නියෝජ්‍ය මානව හිමිකම් කොමසාරිස්වරිය වන නඩා අල්-නශීප් කියා සිටියේ මානව හිමිකම් කවුන්සිලය සතුව ශ්‍රී ලංකාවේ යුද අපරාධ සම්බන්ධයෙන් අති විශාල සංඛ්‍යාවක් සාක්ෂි සහ වාර්තා පවතින බවත් අවශ්‍යතාවය අනුව ඒවා ලබා දිය හැකි බවත්ය.
මෙම සාක්ෂි යුද වැදුනු දෙපාර්ශයටම අදාළ ඒවාය.
මෙවර කවුන්සියලට ඉදිරිපත් කර ඇති ශ්‍රී ලංකාව පිලිබඳ යෝජනාවෙහි එක් අංගයක් මෙසේය:
ක්‍රියාකාරිත්ව ජේදය 6: වගවීම ඉදිරියට ගෙන යාමේ අරමුණින් ශ්‍රී ලංකාවේ මානව හිමිකම් උල්ලංඝනය කිරීම් සහ කෙළෙසීම් සම්බන්ධ සාක්ෂි සංරක්ෂණය හා විශ්ලේෂණය කිරීමේ වැදගත්කම හඳුනාගන්නා අතර බරපතල මානව හිමිකම් උල්ලංඝනය කිරීම හෝ ජාත්‍යන්තර මානුෂීය නීතිය බරපතල ලෙස උල්ලංඝනය කිරීම සම්බන්ධ තොරතුරු සහ සාක්ෂි ඒකාබද්ධ කිරීම, විශ්ලේෂණය කිරීම සහ සංරක්ෂණය කිරීම සඳහාත්, වින්දිතයින් සහ දිවි ගලවා ගත් අය වෙනුවෙන් පෙනී සිටීම සඳහාත් සහ නිසි අධිකරණ බලය සහිත සාමාජික රටවල අදාළ අධිකරණ කටයුතු සඳහා සහාය වීම සඳහාත් අනාගත වගවීමේ ක්‍රියාවලීන් උදෙසා උපාය මාර්ග සංවර්ධනය කිරීම වෙනුවෙන් සහ මානව හිමිකම් මහ කොමසාරිස් කාර්යාලයේ ධාරිතාවය ශක්තිමත් කිරීමට තීරණය කරයි;
මෙම ජේදය කෙලින්ම කියන්නේ අනාගතයෙහි පැවරෙන නඩුු සඳහා දැන් සිටම සූදානම් වීමයි.
විශ්වීය අධිකරණ බලය යටතේ අන් රටවල කරන ලද මානව හිමිකම් කෙළෙසීම් සම්බන්ධයෙන් ස්වකීය රටවල නීති අනුව නඩු පැවරීමට පියවර ගැනීම දැන් ක්‍රමයෙන් ඉහළ යමින් තිබේ. පසුගිය 23 දා ජර්මනියෙහි දී සිරියානු යුද නිලධාරියකුට සිර දඬුවම් නියම කරන ලද අතර ස්විස්ටර්ලන්තයෙහි ලයිබීරියානු යුද අපරාධකරුවකුට ද, පින්ලන්තයෙහි සියරා ලියොන්හි යුද අපරාධකරුවකුට ද, එරෙහිව දැන් නඩු පවරා තිබේ. මේ දෙදෙනාම සන්නද්ධ කණ්ඩායම්හි නායකයින්ය.
මහ කොමසාරිස්වරියගේ වාර්තාව සහ ඉදිරිපත්ව ඇති ශ්‍රී ලංකා යෝජනාව, විශ්වීය අධිකරණ බලය යටතේ විවිධ රටවලදී ශ්‍රී ලංකාවේ මානව හිමිකම් කෙළෙසිම් සම්බන්ධයෙන් නඩු පැවැරීමට අවශ්‍ය සහාය සූදානම් කිරීමට යෝජනා කිරීම අප තේරුම් ගත යුත්තේ මෙම පසුබිම යටතේ ය.
ඒකාධිපතියන් සමග තොඳොල් වෙමින්...
මානව හිමිකම් කවුන්සිලයේ ශ්‍රී ලංකාව පිළිබඳ ක්‍රියාකාරී කන්ඩායම මෙම වසර මුලදී ශ්‍රී ලංකාවට යෝජනා කළේ දෙපාර්ශවයම එක්වී යෝජනාවක් ගෙන ඒමටය. ඒ සඳහා සකස් කරන ලද කෙටුම්පත මධ්‍යස්ථ එකක් වී යැයි කියනු ලැබේ. එසේ නමුත් 2020 මාර්තු මාසයේදී කවුන්සිලයෙහි සම්මත කරන ලද සියලූ ශ්‍රී ලංකා යෝජනාවලින් අඬබෙර ගසා ඉවත් වූ රාජපක්ෂලාට එවැනි මධ්‍යස්ථ එකඟතාවයකට පැමිණීමට හෝ ඉඩ ගත්තේ නැත.
රාජපක්ෂලා ශ්‍රී ලංකාව නැවතත් අන්තර් ජාතික වශයෙන් හුදකලා කරමින් ඉන්නේ ඒකාධිපතියන් සමග තොඳොල් වෙමිනි. සමහර විට රාජපක්ෂ හීනය ද එම තුරුළටම යෑම විය හැකිය.
සුනන්ද දේශප්‍රිය
පසු සටහන: දැනට ජිනීවාහි පැවැත්වු කතා අනුව රාජපක්ෂලා තමාට පක්ෂව ඡන්ද 21 යි විරුද්ධව ඡන්ද 15 යි යනුවෙන් කියමින් බයි ජනයා චූන් කරති. නමුත් සැබෑ ඡන්දය තිබෙන්නේ ලබන 19 වෙනිදා ය.
---------------------------
by (2021-02-28 11:27:45)
c
