කූඨ කුමන්ත්රණ කණපිට හැරවූ කණ්ඩුල මෙහෙයුම (2 වන කොටස) - ජනපතිගේ ඩීල් බෑනා රාජිතගේ නිවසට..! කතානායකයව හොස්පිට්ල් යවන්න වැඩේ කරපං..!!
අභ්‍යන්තරයේ සිද්ධ වූ ඇත්තම කතාව..
http://www.lankaenews.com/news/8571/si
Kandula-opporation2-LeN-28.11.2018-3
(ලංකා ඊ නිව්ස් -2018.නොවැ.28, පෙ.ව.7.40) පසුගිය නොවැම්බර් 14 වෙනිදා ස්ථාවර නියෝග 47.1 යටතේ, පක්ෂයි හා විපක්ෂයි ලෙස මෛත්රීපාල සිරිසේන (එම්එස්) හා මහින්ද රාජපක්ෂ (එම්ආර්)ට එරෙහි යෝජනාව ඡන්ද 122ට 0ක් ලෙස සම්මත වීමෙන් පසු කථානායකවරයා එම තීරණය ජනාධිපතිවරයාට ලිඛිතව දැනුම් දෙන ලදී. එහිදී කථානායකවරයාගේ තීරණය කොටස් දෙකක් වූ අතර, පළවෙනි කොටසින් ජනාධිපතිවරයාගේ ගැසට් නිවේදන තුන නීති විරෝධි බව ප්රකාශ කර තිබූ අතර, දෙවනි කොටසින් මහින්ද රාපක්ෂ ප්රමුඛ කැබිනට් මණ්ඩලය ප‍්‍රතික්ෂේප කර තිබුණි. මේ ගැන සිය නීතිවේදීන්ගෙන් විමසූ ජනාධිපතිවරයාට ඔවුන් පෙන්වා දුන්නේ පළමු තීරණය පිළිගතහොත් එමගින් ජනාධිපතිවරයා ව්‍යවස්ථාව චේතාන්විතව උල්ලංඝණය කොට ඇති බව පිළිගැනෙනා නිසා ඔහුට එරෙහිව මූලික අයිතිවාසිකම් නඩුවක් හෝ අනාගතයේ දෝශාභියෝගයක් හෝ ගෙන ඒමට ඉඩ ඇති බවය.
ජනපතිගේ ඩීල් බෑනා රාජිතගේ නිවසට..
කෙසේ වෙතත්, මෙම වගන්තිය නොවැම්බර් 02 වෙනිදාත් 14 වෙනිදාත් යෝජනාවලට රනිල් වික්රමසිංහ එක් කරන ලද්දේ යටි අරමුණක් සහිතවය. එනම් එම ගැසට් නිවේදන නොමැතිවූ විට නොවැම්බර් 25 තත්ත්වය නොහොත් නිල අගමැති රනිල් බව ව්‍යංගයෙන් පිළිගැනෙනා නිසාය. මේ හා සමගම ජනාධිපතිවරයා සිය බෑණා රාජිත සේනාරත්න ඇමතිවරයාගේ නිවසට යවන ලද අතර ඉන් පසු රාජිත සේනාරත්න හා ජනාධිපතිවරයා අතර සාකච්ඡාවක් ඇති විය. කෙසේ හෝ තමාට එරෙහි වගන්තිය ඉවත් කර දෙන ලෙස ජනාධිපතිවරයා ඉල්ලා සිටි අතර, එය රාජිත විසින් අගමැතිවරයාට සහ කථානායකවරයාට දැනුම් දෙනු ලැබීය. අගමැතිවරයා එම වගන්තිය ඉවත් කිරීමට කැමැත්තක් නොදැක්වූ අතර, කථානායකවරයා පවසා සිටියේ ජනාධිපතිවරයාගේ විධායක බලය ඉක්මවීමට පාර්ලිමේන්තුවට අවශ්‍ය නැති බවත්, පාර්ලිමේන්තුවට බලය ඇත්තේ ව්‍යවස්ථානුකූලව විශ්වාස භංගය පිළිගැනීම බවත්, එහෙයින් තමා එම කොටස පිළිගන්නා බව ජනාධිපතිට දන්වන ලෙසයි. ඒ අනුව 15 වෙනිදා උදෑසන කථානායකවරයා පාර්ලිමේන්තුව අමතා ප්රකාශ කර සිටියේ ස්ථාවර නියෝග 135 යටතේ, විධිමත්ව බහුතර මතයෙන් ස්ථාවර නියෝග අත්හිටුවන බවත් ස්ථාවර නියෝග 47(1) යටතේ විශ්වාස භංගය අනුමත වූ බවත්, එහෙයින් මහින්ද රාජපක්ෂ අග්රාමාත්යවරයා හා ඔහුගේ කැබිනට් මණ්ඩලය විසිරී ගිය බවයි.
ඕකව හොස්පිට්ල් යවන්න වැඩේ කරපල්ලා...
මේ අතර 14 දා රාත්රියේ අරලියගහ මන්දිරයේ පක්ෂනායක රැස්වීමට වාර්තා වූයේ මහින්ද රාජපක්ෂ පසු දින (15) අග්රාමාත්යවරයා ලෙස ප්රකාශයක් කිරීමට යන බවයි. සජිත් ප්‍රේමදාස මහතා ඇතුළු බොහෝ එජාප නායකයින්ට අවශ්‍ය වූයේ අග‍්‍රාමාත්‍යවරයාට ප්රකාශය කිරීමට ඉඩ දීමය. නමුත් එවැන්නක් සිදු කළහොත් 14 වෙනිදා විශ්වාස භංගයෙන් පලක් නොවන බව දැඩිව ප්රකාශ කළ තරුණ මන්ත්රී කණ්ඩායමට චම්පික රණවක, මනෝ ගනේෂන් හා රාවුෆ් හකීම් යන පක්ෂ නායකයන් ගේ මතය අනුව, මන්ත‍්‍රීවරයෙකු ලෙස පමණක් එම ප්රකාශය කිරීමට ඉඩදීමට එකඟ වනු ලැබීය. එමෙන්ම ඔහුගේ කතාව සම්බන්ධයෙන් නැවත වතාවක් ඡන්දය විමසීමට ද තීරණය කෙරිණි. 15 වෙනිදා පාර්ලිමේන්තුවේදී මේ ක්රියාවලිය අකුරටම සිදුවූ අතර, රාජපක්ෂ කඳවුරේ තවත් බල උපායක් බිඳ වැටිණි.
එවිට කථානායකවරයා ඉලක්ක කරගත් ප්රහාරයක් දිනේෂ් ගුණවර්ධන ගේ නායකත්වයෙන් ආරම්භ විය. මෙයට මහින්ද රාජපක්ෂ ගේ අනුග‍්‍රහය ලැබුණු අතර, කථානායකවරයා වෙත ශාරීරීක හා මානසික පීඩාවක් ගෙන ඒමෙන්, ඔහු ඉලක්ක කරගැනීමෙන්, ඔහුව භෞතික හා මානසික ලෙස බිඳ වැට්ටවිය හැකි යැයි මැදමූලන මහින්දගේ තක්සේරුව විය.
‘ඕකාව හොස්පිට්ල් යවන්න වැඩේ කරපල්ලා’ යන්න මහින්දගේ උපදේශය විය. කථානායක රෝහල් ගතකර පාර්ලිමේන්තුව අකර්මන්‍ය කිරීම ඔවුන්ගේ පාදඩ ඉලක්කය විය. මේ සඳහා තිලංග සුමතිපාල, එස්.බී. දිසානායක, විමල් වීරවංශ, උදය ගම්මන්පිල ආදී කුමන්ත්රණ සහායකයින් ඍජුව මැදිහත්ව ක‍්‍රියාකෙළෝය. නමුත් අවසානයේ සියළු පව් කැළණියේ ප‍්‍රසන්න රණවීර හරහා යැවීමට ද ඔවුන්ම ක්රියා කෙළේය.
නීත්‍යානුකූල අගමැති කවුද.?
ඇතිවූ සිදුවීමෙන් ජනාධිපතිවරයා කලබලයට පත්විය. ඔහු කථානායකවරයාට දුරකථනයෙන් කතා කළේය. පක්ෂ නායකයින්ට තමා හමුවන ලෙස ආරාධනා කළේය. ඉන් පසුව ඔහු මහින්ද රාජපක්ෂ හා දිනේෂ් ගුණවර්ධනට කතා කළේ කථානායක හා පිරිස හමුවීමෙන් පසු තමාව හමුවන ලෙසත්, අවශ්‍ය නම් කණ්ඩායම් රැස්වීමක් කැඳවන ලෙසත්ය. 15 වෙනිදා හවස 5 ට කථානායක කරු ජයසූරිය, විපක්ෂ නායක ආර් සම්බන්ධන්, ජවිපෙ නායක අනුර දිසානායක හා එක්සත් ජාතික පෙරමුණේ නියෝජිතයින් දෙළොස් දෙනෙක් ජනාධිපති කාර්යාලයට ගියෝ ය.
ජනාධිපතිවරයා පැමිණීමට පෙර අනුර දිසානායක කථානායකවරයාගෙන් ඇසුවේ මෙය පාර්ලිමේන්තුවේ නායක රැස්වීම නැතහොත් එක්සත් ජාතික පෙරමුණේ රැස්වීමක් ද කියාය. රැස්වීමට පාර්ලිමේන්තු නායක රැස්වීමට අදාල නොවන කබීර් හෂීම්, අකිල විරාජ්, තලතා අතුකෝරාල, සජිත් ප්‍රේමදාස, ඉරාන් වැනි අයගේ සහභාගීත්වය ප‍්‍රතික්ෂේප කළ අනුර, සිය විරෝධය දක්වා රැස්වීමෙන් පිටව ගියේය.
ජනාධිපතිවරයා සුපුරුදු ලෙස සිය දේශපාලන අඳෝනාව පල කරන ලද අතර, හමුදා බුද්ධි අංශ හා නාවික හමුදා බුද්ධි අංශ තමා ඝාතනය කිරීමේ කුමන්ත‍්‍රණය සම්බන්ධයෙන් වූ වැදගත් තොරතුරු රැසක් සොයාගත් බව ද ප්රකාශ කළේය. එයට රනිල් වික්රමසිංහගේ ඇති ---බව කියන--- සම්බන්ධය ද පෙන්වා දෙමින්, තමාට ඔහු සමග ආණ්ඩු කළ නොහැකි බව ප්රකාශ කළේය. මෙහිදී අදහස් පල කළ රාජිත සේනාරත්න කියා සිටියේ කථානායකතුමා දැනටමත් විශ්වාස භංගය පමණක් පිළිගෙන ඇති නිසා ජනාධිපතිවරයාට ප‍්‍රශ්ණයකින් තොරව විකල්ප අගමැතිවරයෙක් පත් කළ හැකි බවයි. මෙහිදී චම්පික රණවක අසා සිටියේ ජනාධිපතිවරයාට කථානායකවරයාගේ ප්රකාශය පමණක් ප‍්‍රමාණවත් ද නැත්නම් අලුත් යෝජනාවක් අවශ්‍ය ද යන්නයි. එවිට ජනාධිපතිවරයා ප්රකාශ කරන ලද්දේ අලුත් යෝජනාවක් අවශ්‍ය බවත්, එහෙත් එය විධිමත්ව සම්මත විය යුතු බවත්, එය තමන් පිළිගන්නා බවත්, නමුත් රනිල් වික්රමසිංහ නැවත පත් නොකළ යුතු බවත්ය. රනිල් පත් කරන්නේ නම් තමා ඉල්ලා අස්වන බවද ජනාධිපති කීවේය. මෙහිදී තලතා අතුකෝරාළ ප්රකාශ කර සිටියේ තමන් ඡන්දයට වැඩ කළේ මෛත්රීට බවත්, වැඩියෙන් හිතවත්ව සිටියේ ජනාධිපතිතුමා සමග බැවින් ඉල්ලා අස්නොවන ලෙසත්, මේ අවස්ථාවේ ජනාධිපතිවරයා අගමැතිවරයා සමග මුහුණට මුහුණ සාකච්ඡා කළ යුතු බවයි.
සජිත් ප්‍රේමදාස ප්රකාශ කර සිටියේ ජනාධිපතිවරයාට එජාපය සැළකූ ආකාරය පිළිබඳව වූ සංවේදනීය කතාව තමා 90%ක් අනුමත කරනා බවය. කෙසේ නමුත් අගමැති ලෙස රනිල් පත් කිරීමට නොහැකි වුවද අගමැතිවරයා ලෙස පත් කළ යුතු පුද්ගලයා පිළිබඳව රනිල් සමග මුහුණට මුහුණ කතා කරනා ලෙස සජිත් මුට්ටිය දමා බැලුවේය. ජනාධිපතිවරයා එයට කැමැත්තක් දැක්වූයේ නැත. ඔහු නැවත ප්රකාශ කර සිටියේ එක්සත් ජාතික පෙරමුණ සජිත් හෝ තමා සමග වැඩ කළ හැකි වෙනත් අයෙක් හෝ අගමැතිවරයා ලෙස පත් කිරීමට කටයුතු කරන්නේ නම් තමා එය පිළිගන්නා බවයි. 16 දිනයේ ප‍්‍රචණ්ඩ ක්රියා ඇතිවීම වළක්වන ලෙස කථානායකවරයා ඉල්ලා සිටි අතර ජනාධිපතිවරයා එයට සහතිකයක් ලබා දුන්නේය. පසුව ඒ පිළිබඳව ඔහු මාධ්‍ය නිවේදනයක් ද නිකුත් කළේය.
නැවතත් පාර්ලිමේන්තුව වාරාවසාන කිරීමට රහස් සාකච්ඡා
පිරිස පිටත්ව ගිය පසු ජනාධිපතිවරයා දිනේෂ් ගුණවර්ධන ප්රමුඛ සිය කණ්ඩායම හමුවූ අතර, බහුතරය නැත්තං කෙසේහෝ හෙට දිනයේදී ද (නොවැ.16) පාර්ලිමේන්තුව කඩාකප්පල් කරන ලෙස ඔවුනට දැන්වීය. මේ පිළිබඳව ලංකා ඊ නිව්ස් පමණක් ප්‍රවෘත්තියක් පළ කරමින් ගමරාළගේ එකඟතාවය මවා පෑමක් ලෙස පවසා තිබිණ. එදින ද ජනාධිපතිවරයා සිය දෙබිඩි පිළිවෙත ප්‍රදර්ශණය කරමින් රාජිත සේනාරත්නට පවසා තිබුනේ හෙට දිනයේ යෝජනාවක් ගෙන ආවොත් විකල්ප අගමැති කෙනෙක් පත් කරන බවයි. එදින රාත්රියේ මහින්ද හා මෛත්‍රී පිල එකතුවී තීරණාත්මක සාකච්ඡාවක් පැවැත්වූ අතර, විශ්වාසභංග යෝජනාවක් ජනාධිපති කියූ ලෙස ගෙන ආවොත් එයින්ම මහින්ද රාජපක්ෂගේ අගමැතිධුරය පිළිගැනෙනා නිසා යෝජනාව ගෙන ආ පසු සභාව කඩාකප්පල්කර කතානායකවරයා පලවා හැරීමටත් ඉන්පසු නැවත වතාවක් පාර්ලිමේන්තුව වාරාවසාන කිරීමටත් සැලසුම් කර ගනු ලැබීය.
කතානායකවරයා පලවාහැරීමේ මෙහෙයුම තිලංග, එස් බී, මහින්දානන්ද, විමල් සහ ගම්මන්පිල ට පැවරිණි. නොවැ.16 වෙනි සිකුරාදා කතානායකවරයා පක්ෂ නායක රැස්වීම කැඳවූ විට වෙනදා නායක රැස්වීමට නොපැමිණෙන පිරිසක් එයට පැමිණ සිටියහ. දිනේෂ් ගුණවර්ධන කියා සිටියේ අගමැති ලෙස මහින්දත්, සභානායක ලෙස තමන්ද නිල වශයෙන් පිළිගෙන තේරීම් සභාව (committee of selection) පත්කර එහි බහුතරය තමන්ට ලබාදී පාර්ලිමේන්තුව පවත්වාගෙන යන ලෙසයි. අවශ්‍යනම් දින තුනක් ඇතුළත විශ්වාසභංගය ගෙන එන ලෙසයි. මෙහිදී ලක්ෂ්මන් කිරිඇල්ල ප්රකාශ කර සිටියේ විශ්වාසභංගයක් ගෙන ඒමට ආණ්ඩුවක් නොමැති බවත්, තමන් යෝජනාවක් ගෙන එන්නේ පහළොස් වැනිදා කතානායකවරයා අග්රාමාත්යවරයා හා කැබිනට් මණ්ඩලය විසුරුවන බවට වූ යෝජනාව ස්ථිර කිරීම සඳහා ඡන්ද විමසීම පමණක් බවයි. මේ සඳහා සභාවේ විවිධ අර්බුද දක්නට ලැබුණු අතර, සභාව කඩාකප්පල් කිරීම හැර අන් විකල්පයක් නොමැතිබව වටහාගත් එස් බී සභාවෙන් එළියට ගියේ ය. ඔහුත් සමග අතුරලියේ රතන හිමි සහ ගම්මන්පිලද එළියට ගියෝ ය.
වාසුදේවට ඉතිරිවුණේ පස්ස හෝදන වම් අත විතරයි..
මෙහිදී වාසුදේව හා රාජිත අතර ගැටුම්කාරී තත්වයක් ඇතිවූ අතර වාසුදේව රාජිතට වාචාලයා සහ ධනපති බත් බැලයා යැයි චෝදනා කළ අතර, රාජිත කියා සිටියේ වාසුදේවට වමෙන් ඉතුරු වී ඇත්තේ පස්ස හෝදන වම් අත පමණක් බවයි. සභානායක කාර්යාලයේ දී එස් බී දිසානායක අයිටීඑන් හා රූපවාහිනී නාලිකාවලට දයාසිරි ජයසේකර ලවා කතා කරවන ලද අතර, ලයිව් ගේමකට ලෑස්ති වන ලෙස දැනුම් දෙන ලදී.
ඒ අනුව අතුරලියේ රතන හිමි කතානායක පුටුවේ වාඩි කරලීමටත්, කථානායකවරයාට පුටුවේ වාඩි වීමට ඉඩ නොලැබෙන ලෙස දොරටු අවහිර කිරීමටත්, සෙංකෝලය පැහැර ගැනීමටත් තිලංග සුමතිපාල ඇතුළු පිරිසකට පැවරිණ.
දහවල් 1.15 වනවිට එක්සත් ජාතික පෙරමුණ කමිටු අංක 2 ශාලාවේ රැස්වී සිය යෝජනාව සාකච්ඡා කරද්දී සිරිසේනගේ හා මහින්දගේ කල්ලිය කතානායක හා ප්‍රජාතන්ත්‍රවාදය පොලු ප්‍රහාර හා මිරිස් කුඩු ප්‍රහාර එල්ල කිරීම ගැන කුමන්ත්රණ කරමින් සිටියෝය. මුලින්ම කතානායක පුටුව කරා එළඹුණේ ජොන්ස්ටන් ප්‍රනාන්දු වන අතර, ඉන්පසු සෙසු පිරිස එතැනට පැමිණ අරුන්දිකව කතානායක පුටුවේ වාඩි කෙරෙව්වේ රතන හිමි පොරොන්දු වූ පරිදි නොපැමිණි නිසාය. ඉන්පසු එතැන ඇති වු ජුගුස්සාජනක ක්රියාවලිය සියලු දෙනාම රූපවාහිනී තිර මතින් දැකගත් බැවින් යළි සටහන් තැබීම අනවශ්‍යය.
මෙහිදී කතානායකවරයා රන්ජන් රාමනායක හා තෙවරප්පෙරුම පිළිබඳ සිද්ධිය සම්බන්ධයෙන් තමන් ක්රියා කරන බවත්, ඔවුන්ව අත්අඩංගුවට ගත යුත්තේ ජනාධිපතිවරයා යටතේ හෝ පොලීසිය විසින් බවත් කිහිප විටක්ම දිනේෂ් ගුණවර්ධන ට දැනුම් දුන්නත් දිනේෂ් අව සිහියෙන් මෙන් කෑගසමින් කතානායකවරයාගේ පැමිණීමට බාධා කිරීමට පටන් ගත්තේ එළඹෙන මැතිවරණයකදී තම මනාප ගොඩ වැඩිකරගත හැක්කේ එලෙස කෑ ගැසීමෙන් යයි සිතූ නිසාය.
මේ අතර එක්සත් ජාතික පෙරමුණේ මන්ත්‍රීවරුන්ගේ ලොබියේදී විශේෂ සාකච්ඡාවක් පැවැත්වුණි. එහිදී තීරණය වූයේ එක්සත් ජාතික පෙරමුණේ මන්ත්‍රීවරු සාමකාමීව සිටිය යුතු බවත් කතානායකවරයා පොලිස් ආරක්ෂාව සහිතව සභාවට පැමිණ ස්ථාවර නියෝග අත්හිටුවා තෙවැනි වරටත් යෝජනාව සම්මත කරගත යුතු බවයි. මේ අනුව එම පණිවිඩය ගෙන රවී කරුණානායක හා මනෝ ගනේෂන් කතානායකවරයා හමුවීමට ගිය අතර චම්පික රණවක, රනිල් වික්රමසිංහ ට ප්රකාශ කර සිටියේ කතානායකවරයා ගෙන්වීමට හදිසි නොවන ලෙසයි. රාජපක්ෂ කල්ලියේ අසික්කිත හැසිරීම ඒ වනවිටත් රූපවාහිනි තිර මත සජීවීව විකාශනය වන නිසා රටේ දැන උගත් මධ්‍යම පංතියට මහින්ද රාජපක්ෂ ගේ සැබෑ ස්වරූපය දැනගැනීමට ඉඩ හරින ලෙස යි. එයට සියලු දෙනා එකඟ වූ අතර අවසානයේ විනාඩි 45 කට පසු කතානායකතුමා තීරණය කළේ වේත්‍රධාරි ගේ ද නිගමනය අනුව සභාව තුළට ගොස් ඡන්ද විමසීම සිදුකළ යුතු බවයි. කතානායක තුමාගේ නිලධාරීන් ඔහු එවැනි අනතුරක් බාර ගැනීමට විරුද්ධ වූ නමුත් කතානායකතුමා කියා සිටියේ ඉදිරි පරම්පරාව ගැන සිතා තමා ඒ අනතුර බාර ගැනීමට සූදානම් බවයි. හමුදා නිලධාරියෙකු වූ එතුමා ‘විස්මිත ප්‍රහාර’ ගැන තිබූ අවබෝධයත් භාවිතාවට ගනිමින් සියළු දෙනා බලාපොරොත්තු වූ දොරටුව මග හැර වෙනත් දොරටුවකින් පාර්ලිමේන්තුවට ඇතුළු වීමට සැලසුම් කෙළේය. ඉන්පසු සිදුවූ දේවල් සියලු දෙනා දන්නා බැවින් ඒ ගැන සටහන් නොතබන නමුත් මේ සිදුවීම පිළිබඳ කතානායකතුමා එදින සවස ඉතා සැහැල්ලුවෙන් තම හිතවතෙකු හා කියා සිටියේ තමා ‘එන්ටබේ ප්‍රහාරය’ මෙන් කිසිවෙකු නොසිතූ ආකාරයෙන් ක්රියා කළ බවයි. හොස්පිට්ල් ඇඩ්මිට් කරන ආකාරයෙන් කතානායකට සලකන්න ගිය මහින්ද ඇණගත්තේ එලෙසය.
එක්සත් ජාතික පෙරමුණේ සහාය කදිමට වැඩ කර තිබුණි
එක්සත් ජාතික පෙරමුණේ උපාය කදිමට ක්‍රියාත්මක වී තිබුණි. මෛත්රීපාල සිරිසේනට මහින්ද රාජපක්ෂට හා දිනේෂ් ගුණවර්ධන ට ඔවුන්ගේ හිතවතුන් ප්රකාශ කර සිටියේ පාර්ලිමේන්තු නාඩගමෙන් ඔවුන් මහත් විනාශයක් දැන උගත් ඡන්දදායකයා අතර සිදුකර ගත් බවයි. විශේෂයෙන්ම තානාපති අංශ වල හා විදේශීය ජනමාධ්‍යවල මෙන්ම ලංකාවේ සමාජ මාධ්‍ය වලද දැඩි පිළිකුල පළවිය. එදිනම හවස ජනාධිපතිවරයා හමු වූ බ්‍රිතාන්‍ය, ජපන් හා ජර්මන් එක්සත් යුරෝපීය තානාපතිවරු පාර්ලිමේන්තුවේ බිඳවැටීම ගැන සිය දැඩි විරෝධය පළ කළහ. විශේෂයෙන්ම ජපාන තානාපතිවරයාගේ අනතුරු ඇඟවීම ජනාධිපතිවරයාට තියුණු බලපෑමක් එල්ල කළ බැවින්, තමන් මින් ඉදිරියට කිසිදු පාර්ශවයක් නොගන්නා බව තානාපතිවරුනට දැන්වීය. තානාපතිවරුන්ගේ සාකච්ඡාවේදී ජනාධිපතිවරයා ස්වාධීන වෙනවා යයි කී බව ඉතා කෙටි වේලාවකින් මහින්ද රාජපක්ෂට දැනගන්නට ලැබුණි ඔහු හා පිරිස ජනාධිපතිවරයාව එදිනම හවස ජනාධිපති කාර්යාලයේ දී මුණගැසුණු අතර බොහෝ නීති තර්ක වලට පසු කම්පනයට පත්ව සිටී ජනාධිපතිවරයා කියා සිටියේ තමා පාර්ලිමේන්තුව නැවත වාරාවසාන නොකරන බවත් එයින් අධිකරණයේ නඩුවට හා අන්තර්ජාතික ප්‍රජාවට තවදුරටත් බලපෑමක් සිදුනොවන බවයි.
සඳුදා වන විට බහුතරය පෙන්වීමට සූදානම් වන ලෙසද ජනාධිපති මහින්දට දැන්වීය. මේ අනුව එදිනම රාත්රියේ යෝෂිත රාජපක්ෂ විසින් වතු දෙමළ මන්ත්‍රීවරුන්ට, මුස්ලිම් මන්ත්‍රීවරුන්ට දුරකථන ඇමතුම් දෙන්නට විය. ඩොලර් මිලියන 5 දක්වා වූ කප්පම් ගෙවීම ට යෝජනා ආරම්භ විය. එමෙන්ම පිල් මාරු කළ එජාපයේ දෙතුන් දෙනාට ද ඇඩ්වාන්ස් එකට අමතර මුදලක් නැවතත් ලබා දෙනු ලැබීය.
කෙසේවෙතත් සෙනසුරාදා හා ඉරිදා යෝෂිතගේ මෙහෙයුම පල දැරුවේ නැත. ඊට එක් හේතුවක් වූයේ දුමින්ද දිසානායකගේ මැදිහත් වීමයි. යම්හෙයකින් එකසිය විසි දෙකෙන් පිරිසක් අනිත් පැත්තට ගියහොත් තවත් තුන්දෙනෙක් එජාපෙ පැත්තට ගැනීම සඳහා වූ යෝජනාවකට දුමින්දගේ සහාය පළවී තිබිණි.
වෛරස් උණ හැදුණා කියා සජිත් මග හරී
සෙනසුරාදා රාත්රියේ හතට පැවැත්වූ එජාපෙ පාර්ලිමේන්තු කණ්ඩායම් රැස්වීමට වැඩි පිරිසක් පැමිණ සිටියේ නැත. මෙම අරගලය දෙසැම්බර් දක්වා ඇදී යෑමට ඉඩ ඇති හෙයින් විධිමත් වැඩපිළිවෙලක් පාර්ලිමේන්තු මන්ත්‍රීවරුන්ට ඉදිරිපත් කළයුතු බව චම්පික රණවක සහ අජිත් පෙරේරා ප්රකාශ කරන ලදී. තමාට වෛරස් උණ සෑදී ඇති බව පවසමින් එදින ද සජිත් පැමිණ සිටියේ නැත. පැමිණ සිටි පිරිස අතර පාර්ලිමේන්තුවේ ඊළඟ පියවර ලෙස රාජපක්ෂලාගේ මූල්‍ය ප්‍රතිපාදන කපා හැරීම යෝජනා වී තිබු අතර, එකී යෝජනා සැකසීමට වෙනම නීතීඥ කණ්ඩායමකට පැවරිණ.
එජාපෙ පාර්ලිමේන්තු කණ්ඩායම් රැස්වීමට ප්‍රථම ජනාධිපතිවරයා සර්ව පාක්ෂික රැස්වීමක් ජනාධිපති කාර්යාලයේ දී එදින සවස පහට පවත්වන ලදී. ඒ අනුව රාජපක්ෂ පාර්ශවය වෙනම ද, එක්සත් ජාතික පෙරමුණු පාර්ශ්වය වෙනමද, සවස 3 ට පමන රැස්වීමේදී අනුගමනය කළ යුතු උපායමාර්ග පිළිබඳ ව සාකච්ඡා කෙරිණි. තමන් සම්මත කළ යෝජනා කිසිවකට පටහැනි කිසිවක් සිදු නොකරන බවට එකඟතාවයක් එක්සත් ජාතික පෙරමුණෙන් ආවේය.
“මහින්ද ඉදිරියේ මා අපහසුතාවයට පත් කරන්න එපා” - සිරිසේන රාජිතට කීවා
කෙසේ හෝ දෙසැම්බර් 7 වැනි දා දක්වා පාර්ලිමේන්තුව දිග්ගස්සා ගතයුතු බවත් විදේශ බලපෑම් හා මේ පිළිබඳව ජනතාව බිය වද්දන ප්‍රචාර ගෙන යා යුතු බවත්, ගෝල්ෆේස් පිටියට ලක්ෂයක් ගෙන ආ යුතු බවටත් රාජපක්ෂ කඳවුරේ අවධානය යොමු වී තිබුණි. හවස පහට රැස්වීමට පෙර රනිල් වික්රමසිංහ මහතා ජනාධිපතිවරයාට දුරකථනයෙන් කතාකර තමාට පෞද්ගලිකව හමුවීමට අවශ්‍ය බව ප්රකාශ කර සිටියේ ය. මේ අතර ජනාධිපතිවරයා රාජිතට දුරකථනයෙන් අමතා මහින්ද ඉදිරියේ තමාව අපහසුතාවයට පත්වෙන කිසිවක් නොකර සිටින්න යැයි බැගෑපත්ව ඉල්ලා සිටියේය. ජනතා විමුක්ති පෙරමුණ සිය විරෝධය පළ කර ඊනියා සර්වපාක්ෂික රැස්වීමෙන් ඉවත් වී තිබිණ.
‘රනිල් ඉවත් කළ ආකාරයට හැකිනම් මාවත් ඉවත් කරන්න’ - මහින්ද
සර්ව පාක්ෂික රැස්වීමේදී ජනාධිපතිවරයා තමන් මේ කිසිවකට සම්බන්ධ නැති මධ්‍යස්ථ චරිතයක් බව රඟපාමින් පාර්ලිමේන්තුවේ ගරුත්වය රැකගැනීම ගැනත්, විධිමත් ඡන්දයක් පැවැත්වීම ගැන ගැනත් පුරසාරම් දැක්වීය. තම අදහස් ගොනු කළ රවුෆ් හකීම් සහ සුමන්දිරන් මන්ත්‍රීවරුන් පෙන්වා දුන්නේ පාර්ලිමේන්තුවේ සම්මත වූ කිසිවක් ආපසු හැරවිය නොහැකි බවත්, ඒවා හැන්සාඩ් වාර්තා ගත වී ඇති බවත්, එහෙයින් චන්දයක් අවශ්‍ය නම් කළ යුතු වන්නේ පහළොස් වැනිදා කතානායක සිදුකළ ප්රකාශය එනම් අගමැති ඇතුළු ඇමති මණ්ඩලය විසිරී ගිය බවට වූ ස්ථාවරය අභියෝගයට ලක්කරන යෝජනාවක් ගෙන ඒම පමණක් ඉතිරිව ඇති බවයි. එයට ස්ථාවර නියෝග හිටුවා සහාය දීමට තමන් සූදානම් බවද ඔවුහු ප්රකාශ කළහ. මෙහිදී ගම්මන්පිල නීති තර්කයක් ගෙන එමින් කියා සිටියේ දැනට නිකුත් වී ඇති හැන්සාඩ් වාර්තා වල විශ්වාසභංගයක් ගැන සඳහන් නොවන බවයි. සුපුරුදු පරිදි ගම්මන්පිල සිදුකළේ අර්ධ වශයෙන් සකස්කර තිබුනු නිල නොවන draft එකක් ගෙන පෙන්වීමය. 14, 15 සහ 16 දිනවල නිල වාර්තා නිකුත්වන්නේ 21 වෙනි බදාදා බව පැහැදිලිව ප්රකාශ කළ අජිත් පෙරේරා 14, 15 සහ 16 ඉදිරිපත් වූ යෝජනා ලිඛිතව නැවත පැහැදිලි කළේය.
මේ අවස්ථාවේදී වාසුදේව ප්රකාශ කළේ මෙතන හැන්සාඩ් හෝ වෙනත් කරුණු ගැන වාද කිරීමෙන් ඵලක් නැති බවත්, ඇත්තේ දේශපාලන ප්‍රශ්නයක් බවත් සුළුතර ආණ්ඩුවක් නීත්‍යානුකූලව පිහිටුවා ඇති බවත් එය ප්‍රතිපක්ෂය පිළිගත යුතු බවයි. අවසානයේ ජනාධිපතිවරයා මහින්ද රාජපක්ෂ සහ රනිල් වික්‍රමසිංහට මේ පිළිබඳව අදහස් දක්වන ලෙස ඉල්ලා සිටි අතර මහින්ද රාජපක්ෂ ප්රකාශ කළේ විධිමත් විශ්වාසභංගයක් පැමිණෙන්නේ නම් තමා ඉවත්වීමට සූදානම් බවයි. ලක්ෂ්මන් කිරිඇල්ල ප්රකාශ කළේ ද එය මහින්ද රාජපක්ෂගේ කීර්ති නාමයට සුබවාදී වන බවයි. එහෙත් මහින්ද රාජපක්ෂ 16 දා පැවති රැස්වීමේදී ජනාධිපතිවරයාට මුහුණටම කියා තිබුනේ තමන් ඉවත් නොවන බවත් හැකිනම් රනිල්ව ඉවත් කළ ආකාරයට තමන්වද ඉවත් කරන ලෙසයි.
වැඩිය කතා නොකළ රනිල් වික්රමසිංහ මෙහිදී ප්රකාශ කළේ නීත්‍යානුකූලව කටයුතු කිරීමට තමන් සූදානම් බවත් බහුතර මතය තමන්ට ඇති බවයි. මෙහිදී විමල් වීරවංශ කියා සිටියේ බහුතර මතය පෙන්වීමට නම් දිවුරුම් ප්රකාශ ලබාදෙන ලෙසයි. එම අභියෝගය බාරගත් ලක්ෂ්මන් කිරිඇල්ල ප්රකාශ කළේ පසුදා උදේ 10 වනවිට දිවුරුම් ප්රකාශ ලබා දීමට තමන් සූදානම් බවයි. එවිට වීරවංසට එරෙහි මතයක් ප්රකාශ කරමින් ගම්මන්පිල කියා සිටියේ දිවුරුම් ප්රකාශ දීමට අගමැතිගේ පුරප්පාඩුවක් නොමැති බවයි. රාජපක්ෂ පාර්ශවයේ ම ඇති වූ විසංවාද හේතුවෙන් කර කියා ගත දෙයක් නොමැති වූ ජනාධිපතිවරයා කෙසේ හෝ සාමකාමීව පාර්ලිමේන්තුව පවත්වන ලෙස සියළු දෙනාගෙන් ඉල්ලා සිටියේය.
සාකච්ඡාව නිමාවී එක්සත් ජාතික පෙරමුණේ කට්ටිය පිටත්ව ගිය පසු ජනාධිපතිවරයා තවත් පැය භාගයක් පමණ මහින්ද රාජපක්ෂ සමග සාකච්ඡා කෙළේය. ජනාධිපති යෝජනා කළේ එදින උදේම පාර්ලිමේන්තුව වර්ජනය කරන ලෙසයි. නමුත් නිමල් සිරිපාල ඇතුළු පිරිස පෙන්වා දුන්නේ එසේ කළහොත් පහසුවෙන්ම පුද්ගල නම්වලින්ම වික්රමසිංහ කණ්ඩායම සිය යෝජනා සම්මත කොට සිය ආණ්ඩුව අවසන් කරනු ඇති බවයි. ඒ අනුව ගැටුම්වලින් විරහිතව 19 වැනි දා පාර්ලිමේන්තුව පැවැත්වීමට එකඟ වීමෙන් පසු කුමන්ත්රණ පිරිස විසිර ගියහ.
එදිනම රාත්රියේ රනිල් වික්රමසිංහ තානාපතිවරුන් හමු විය. “නීති විරෝධී ආණ්ඩුවට එරෙහිව අභියෝගය ජය ගැනීම” නම් වූ විධිමත් වැඩපිළිවෙලක් චම්පික රණවක විසින් මන්ත්‍රීවරුන්ට ඉදිරිපත් කරන ලදී. එහිදී දයා ගමගේ යෝජනා කළේ එය දැන්මම පුද්ගලයින් නම්කර ක්‍රියාත්මක කළ යුතු බවයි. එහිදී අත්පොලසන් නාදයකින් ඊට අනුමැතිය ද ලැබිණි
කථානායකට පොලු ප්රහාරයක්.?
පසුදින දවල් 12 ට පක්ෂ නායක රැස්වීම ආරම්භ වූ අතර ලක්ෂ්මන් කිරිඇල්ල කතානායකවරයා ප්රකාශ කර සිටියේ 16 සිකුරාදා සිදුවූ සිදුවීම් පිළිබඳව තමා වරප්‍රසාද ප්‍රශ්නයක් පැන නගින බවයි. රාවුෆ් හකීම් කියා සිටියේ කතානායකවරයාගේ ප්රකාශය පිළිබඳව ඡන්දය විමසීමට තමන් සූදානම් බවයි.
නීත්‍යානුකූලව තේරීම් සභාව පත්කර ගතයුතු නිසා ඒ පත්කර ගැනීමේ යෝජනාවක් තමන් ඉදිරිපත් කරන බව ද අනුර දිසානායක ප්රකාශ කළේය. මෙහිදී දිනේෂ් ගුණවර්ධන කියා සිටියේ විජේවීර මරා අළු කළ අය සමග අනුර දිසානායක දේශපාලන දීගයක බවයි. එවිට අනුර දිසානායක කීවේ දිනේෂ් ගේ පියා මෙන් ම බාප්පා ද කෙළවර කළේ යූඇන්පියෙන් බවත් උදේට ගිරිය යටින් පාර්ලිමේන්තුවේ යූඑන්පී නායකයින්ට හූ කියමින් රෑට රෝයල් එකේ පරණ ක්ලාස් මේට් ලා සමග හඳපානේ කතා පැවැත්වීම තමන්ගේ දේශපාලනයේ නොමැති බවයි. ඔවුන් දෙදෙනා අතර කැලෑ ආණ්ඩු පිහිටුවීම පිළිබඳව ගැටුම සමථයකට පත්කිරීමට කථානායකතුමාට මැදිහත් වෙන්නට සිදුවිය.
කෙසේවෙතත් කතානායකවරයාට තර්ජනය කිරීමට මන්ත්රී කණ්ඩායමක් පැමිණෙන බවට තොරතුරු ලැබීම නිසා කතානායක කාර්යාලය අසල සියයකට අධික පොලිස් නිලධාරීන් පිරිසක් රඳවා තිබිණි. පාර්ලිමේන්තුව ආරම්භ වූ විට නියෝජ්‍ය කතානායකවරයා තේරීම් සභාව පත් කිරීමේ යෝජනාවත් සභාව කල් තැබීමේ යෝජනාවක් ඉදිරිපත් කළේය. එමෙන්ම එක්සත් ජාතික පෙරමුණේ මන්ත්‍රීවරු විසින් අගමැති කාර්යාලයේ වියදම් කප්පාදු කිරීමට you යෝජනාව සභාගත කළ අතර, එය 29 වැනිදා (හෙට) විවාදයට ගෙන ඡන්ද විමසීමට ද තීරණය කෙරිණි.
කෝපයෙන් එළියට පැමිණි මහින්ද තමාගේ මුදල් කැපීමට ගියහොත් තමන්ද මන්ත්රී වැටුප් කපා දමන බව තර්ජනාත්මකව ප්රකාශ කර එස්බී ට හා අවට සිටි අයට කීවේ 113 හොයන්න කලින් පාර්ලිමේන්තුවේ ඉන්න එවුන් ටික වත් ගෙන්නා ගන්නා ලෙසයි. එදින පාර්ලිමේන්තුවට පැමිණ සිටියේ රාජපක්ෂ කණ්ඩායමේ 44 දෙනෙකු පමණි. 29 වැනිදා තමාට තවත් පරාජයක් ලබාගත නොහැකි බවත් එක්කෝ කතානායකවරයාට පොල්ලකින් ගැසීමට හෝ අනිත් පැත්තෙ එවුන් පස් දෙනෙක් හොඳින් හෝ නරකින් මේ පැත්තට ගැනීමට ක්‍රියාකරන ලෙසත් කෝපයෙන් ප්රකාශ කළ මැදමූලනේ මහින්ද රාජපක්ෂ පාර්ලිමේන්තුවෙන් නික්මුණේය.
(මතු සම්බන්ධයි)
බී.එම්. චන්ද්‍රකීර්ති විසිනි
සබැඳි පුවත
රාජපක්ෂ බලකොටුව බිඳලූ කණ්ඩුල මෙහෙයුම..! මහින්ද අගමැති කරවීමේ සිට 14 දක්වා ගුප්ත කතාව
