2020දී ජවිපෙ බලයට එනහැටි අනුර ලක්බිමට කියපු කතාව
Friday, 18 November 2016 20:21
http://lankatruth.com/site/index.php/2014-08-09-14-28-31/ප්‍රමුඛ-පුවත්/item/3292-2020දී-ජවිපෙ-බලයට-එනහැටි-අනුර-ලක්බිමට-කියපු-කතාව
JVP_want_win_2020_LT_18.11.2016
ජනතා විමුක්ති පෙරමුණේ නායක අනුර දිසානායක මහතා පසුගිය ඉරිදා (13) ලක්බිම පුවත් පත සමග පැවති පැවති සාකච්චාවකදී 2020දී ජවිපෙ බලය ලබා ගන්නා ආකාරය සම්බන්දයෙන් පුළුල් පැහැදිළි කිරීමක් සිදු කර තිබූ අතර එම සාකච්ඡාව සම්පූර්ණයෙන් පහතින් පල වේ.
2020 ජවිපෙ බලයට එන බව පැවසුවා. කොහොමද එහෙම කියන්නේ ?
ඕනෑම දේශපාලන ව්‍යාපාරයක් අරමුණ වන්නේ බලය ලබාගැනීම හා ලබාගත් බලය පවත්වා ගැනීමයි. අපගේ අරමුණ 2020දී බලය ලබාගැනීමට සමත්වන ජනතා ව්‍යාපාරයක් ගොඩනැගීමයි. එබැවින් අප විසින් ප‍්‍රකාශ කර තිබෙන්නේ, හුදු බලය ලබාගැනීමක් නොව ඒ සඳහා අවශ්‍ය වන ජනතා ව්‍යාපාරය ගොඩනැගීමයි. ඒ ව්‍යාපාරයට බලය ලබා දෙනවාද එසේ නැත්නම් තවදුරටත් මෙම සාම්ප‍්‍රදායික පක්ෂවලට බලය ලබා දෙනවාදැයි ජනතාව තීරණය කරාවි.
බලය ලබා ගැනීමට සමත් වන ජනතා ව්‍යාපාරයක් ගොඩ නඟනවා යන්න පවසද්දී බලය ලබා ගැනීමක් ගැන ගම්‍ය වෙනවා නේද?
පැහැදිලිව අපගේ අරමුණ අවුරුදු 68ක් මුළුල්ලේ දියත් වෙමින් තිබෙන අසාර්ථක ආර්ථික වැඩපිළිවෙළටත්, ග‍්‍රාම්‍ය දේශපාලන සංස්කෘතියටත්, කඩවැටුණු සමාජ දේහයටත් විකල්ප දේශපාලන වැඩපිළිවෙළක් ජයග‍්‍රහණය කරවීමයි. අපි සුබවාදී මිනිසුන්. අපට වඩා යහපත් දේශයක් නිර්මාණය කිරීමේ අවංක වුවමනාවක් තිබෙනවා. ඒ වෙනුවෙන් බලය අත්පත් කරගැනීමේ අරමුණින් යුතුව අපගේ පක්ෂය වැඩකරමින් ඉන්නවා.
ජනතා විමුක්ති පෙරමුණ මෙපමණ කාලයක් මැතිවරණ සඳහා ඉදිරිපත් වුවත් පරාජය වීම තුළින් පැහැදිලි වන්නේ ජනතා ව්‍යාපාරය ගොඩනැගීමට තවමත් අසමත් වූ බවද?
අප පෙනී සිටින්නේ, හුදු ආණ්ඩු මාරුවක් වෙනුවෙන් නොවෙයි. ආණ්ඩු මාරුවීම් සාම්ප‍්‍රදායිකව අවුරුදු පහෙන් පහටත් විශේෂ අවස්ථාවල අවුරුදු දෙකෙන් තුනෙනුත් සිදුවී තිබෙනවා. නමුත් සමාජ ආර්ථික දේහයේ පුළුල් පරිවර්තනයක් සිදු වන්නේ, සමහර අවස්ථාවල දශකවලින්. ඔබ කියූ පරිදි අප තවමත් ඒ සඳහා වූ පුළුල්තම ජනතා ව්‍යාපාරය ගොඩනැගීමට අසමත් වී තිබෙනවා. ඉන් කිසිසේත්ම අපි සමාජය වෙත ගෙනයන මතවාදය හා වැඩපිළිවෙළ අසාර්ථක සහ නිවැරදි නොවන බවක් ගම්‍ය වන්නේ නැහැ. පැවති පාලනයත් පවතින පාලනයත් කටයුතු කළ හා කරන ආකාරයෙනුත් අප වඩාත් නිවැරදි බව තව තවත් තහවුරු වනවා.
එසේ අසමත් වීමට හේතුව ?
එවැනි සමාජ පරිවර්තනයක් පක්ෂයකට හෝ කණ්ඩායමකට වුවමනාවූ පලියටම කළ නොහැකියි. ජනතාවට තවදුරත් මේ ආකාරයට ජීවත්වීමට නොහැකි බවත් සාම්ප‍්‍රදායික පාලකයින්ට තවදුරටත් තමන්ගේ ප‍්‍රශ්නවලට විසඳුම් ලබාදිය නොහැකි බවත් ඒත්තු යා යුතුයි. වර්තමානයේ ජනතාවට මේ තත්වය තේරුම් යමින් තිබෙනවා. සමාජ පරිවර්තනයක් වෙනුවෙන් බහුතර ජනතාවගේ විශ්වාසය දිනා ගත යුතුයි. දේශපාලන ව්‍යාපාරයක් ලෙස අප උත්සාහ ගනිමින් ඉන්නේ මේ තත්වය ජනතාවට ඒත්තු ගැන්වීමටයි.
ජනතා විමුක්ති පෙරමුණේ පසුගිය "කැරළි ගැසීම්" (හැත්තෑ ගණන් සහ අසූ ගණන්) මෙම ජනතා විශ්වාසය දිනාගැන්ම නොහැකිවීමට හේතු වූවාද?
1971 සහ 1989 අරගල හුදු කවරෙකුගේ හෝ පුද්ගලික හිතුවක්කාරකමක ප‍්‍රතිඵලයක් නෙමෙයි. එය ගොඩනැගෙමින් තිබුණු සමාජ ඓතිහාසික තත්වයේ ප‍්‍රකාශනයක්. ඒ සඳහා අපේ පක්ෂය නායකත්වය දී තිබෙනවා. එම අරගල මුළුමනින්ම පෞද්ගලික අරමුණු පසෙකලා ජනතාවගේ පොදු වුවමනාව වෙනුවෙන් සිදුකළ ඒවායි. එහෙත් එම අරගල පරාජයට පත්වූවා. ඉතිහාසය ලියන ලද්දේ, ජයග‍්‍රහණය කරන ලද සතුරන් විසින්. ඒ නිසාම එම ඉතිහාසය පිළිබඳව විකෘති කරන ලද අදහසක් ජනතාව තුළ පවතිනවා. එහෙයින් ඒ පිළිබඳව ජනතාව තුළ පවතින අඳුරු අදහස අපට අභියෝගයක්ව පවතිනවා.
ජවිපෙ විසින් මෙම ජනතා ව්‍යාපාරය ගොඩනැගීමට සූදානම් වන්නේ කුමන අන්දමකට ද?
අපේ රටේ පීඩාවට පත් වූ විවිධ ජන බලවේග තමන්ගේ ක්ෂේත‍්‍රයේ පැනනගින පීඩාවට එරෙහිව අරගල කරමින් ඉන්නවා. උදාහරණයක් ලෙස ගොවි ජනතාව සහනාධාර කප්පාදුව, අලෙවිය පිළිබඳ ගැටලු ආදී තමන් මුහුණපාන ගැටලු සමග පොරබදනවා. රාජ්‍ය හා පෞද්ගලික අංශයේ වැඩකරන ජනතාව, ධීවර ජනතාව, රැකියා විරහිත තරුණයින් මේ ආකාරයටම ගැටලු සමග පොරබදමින් ඉන්නවා. ඔවුන් අද වන විට මෙම පොරබැදීමෙන් හෙම්බත්වී සිටිනවා. ඇත්තටම මෙම ක‍්‍රමය තුළ තමන්ගේ ප‍්‍රශ්නවලට විසඳුම් නොමැති බව ඔවුන්ට ඒත්තු යමින් තිබෙනවා. ඒ වගේම බුද්ධිමතුන්, සාහිත්‍යධරයින්, කලාකරුවන්, පරිසරවේදීන්, නිෂ්පාදකයින් තමන්ගේ ක්ෂේත‍්‍රවල මේ ආකාරයේම අර්බුදයන්ගෙන් හෙම්බත්වී තිබෙනවා. අප මධ්‍යස්ථානයක් ගොඩනගන්නේ ඔවුන්ට සියලු දෙනා වෙනුවෙනුයි. මේ වනවිටත් අප ඔවුන් සමග සාකච්ඡාවක සිටිනවා.
ජවිපෙ "රතු අලි" කියන එක ජවිපෙට තියෙන ලොකුම චෝදනාවක්. එසේ තිබියදී ජනතාව අතර ජවිපෙ "ස්ථාවර" බව ඔබ හිතනවාද?
මේ අවලාද අපිට අලුත් දෙයක් නෙමෙයි. පක්ෂය ආරම්භ කරන කොටම අපිට "සීඅයිඒ කෙමණක්" යැයි අවලාද නැගුවා. එහෙත් ඇමරිකානු අධිරාජයවාදයට ප‍්‍රබලම විවේචනය එල්ල කළේ අපයි. ඒ වගේම 1978දී අපේ පක්ෂයට "යූ.ඇන්.පී. වලිගයක්" යැයි කිවුවා. ඒත් යූඇන්පිය අපේ පක්ෂය තහනම් කරලා, අපේ පක්ෂයේ නිර්මාතෘ ඇතුළු 60,000ක් සගයින් මරාදැමුවා. 2006-7 වකවානුවේදී අපට මහින්දගේ සාටකයේ එල්ලුණායැයි අවලාදයක් නැගුවා. එහෙත් මහින්දට එරෙහිව ප‍්‍රබලතම ප‍්‍රහාරය එල්ල කළේ ජවිපෙ බව නොදන්නා කෙනෙක් නැහැ. ඔබ ඇසූ පරිදි අදත් පරාජයේ වියරුවෙන් රාජපක්ෂ කල්ලිය එවැනි අවලාදයක් නඟනවා. එහෙත් එවැනි අවලාදයක් වසරක්වත් වලංගු නොවූ බව මෑත දේශපාලන සිදුවීම් විසින් ඒත්තු ගන්වා තිබෙනවා.
ජවිපෙට මිනිසුන් තුළ තිබූ ගෞරවය අදත් ඒ තත්ත්වයෙන්ම තිබෙන බව විශ්වාසද?
සතුරන් විසින් පක්ෂයත් පක්ෂ නායකයිනුත් සම්බන්ධයෙන් ජනතාව තුළ වන ගෞරවය සහ විශ්වාසය බිඳදමන්න විවිධ අවලාද ගොඩනගනවා. එහෙත් රටේ දේශපාලනය සම්බන්ධයෙන් අවධානයෙන් සිටින ඕනෑම කෙනෙක් දන්නවා, අපගේ දේශපාලනය තුළ රටත් ජනතාවත් ඉදිරියෙන් තබා කටයුතු කරන බව. අපගේ දේශපාලනයේ ඉදිරි දැක්ම, අපේ පක්ෂ සාමාජිකත්වයේ කැපවීම ඔවුන් දන්නවා. ජනතාවගේ ඕනෑම ගැටලුවකදී ඉක්මණින්ම එය ඉදිරිපත් කළ යුත්තේ ජවිපෙට බව ජනතාව විශ්වාස කරනවා. අප හොඳාකාරවම දන්නවා ඡන්දවලින් ප‍්‍රකාශයට පත් නොවුණු කැමැත්තක් ජවිපෙ සම්බන්ධයෙන් සමාජයේ තිබෙනවා. මේ පාලකයින්ගේ පරිහානිය තම ඇස් ඉදිරිපිට දිගහැරෙද්දී ඔවුන් තුළ ජ.විපෙ කෙරෙහි වන විශ්වාසය සහ ගෞරවය තවත් ශක්තිමත් වනවා.
උනුත් එකයි, මුනුත් එකයි කිව්වත් ජවිපෙ එක්තරා පක්ෂයකට සහයෝගය ලබාදෙනවා යන්න ඇත්තක් නේද?
අප විසින් "උනුත් එකයි මුනුත් එකයි" බව කල්තබා ප‍්‍රකාශ කළා. අද වනවිට එය ජනතාව විසින්ම ප‍්‍රකාශ කරන තත්වයක් ඇති වී තිබෙනවා. ජවිපෙ අපට අපේම වූ දේශපාලන අන්‍යන්‍යතාවයක් , අරමුණක් තිබෙනවා. නමුත් අප ඒ අරමුණ කරා යාමේදී රට තුළ පැනනගින අනෙකතුත් දේශපාලන චලනයන් පිළිබඳව සැලකිල්ලට ලක්කර ගනිමින් අපි අපේ දේශපාලන උපක‍්‍රම සකස් කර ගත යුතුව තිබෙනවා. එහි අවසන් අපේක්ෂාව අපගේ අරමුණ කරා ළඟා වීමයි. ඒ දෙස බාහිරින් බලන කෙනෙක් වැරදි ලෙස තේරුම් ගන්න පුළුවන්.
2020 මැතිවරණයට ජවිපෙ සූදානම් වන්නේ මොන විදිහට ද?
අපේ ඉලක්කය, පීඩාවට පත් සියලු ජනතා බලවේගයන් එක් මධ්‍යස්ථානයක් වටා පෙළගැස්වීමයි; ඒ වගේම මේ රට ගොඩනැගීම පිළිබඳ අපගේ වැඩපිළිවෙළ ජනතාව තුළ පුළුල් සංවාදයට ලක්කිරීමයි. 2020දී අපේ බලාපොරොත්තුව හුදු ආණ්ඩු මාරුවක් වෙනුවට මතවාදයක් හා බලවේගයක් ගොඩනැගීමයි. එහෙයින් සාම්ප‍්‍රදායික දේශපාලන පක්ෂවලට තවදුරටත් රැවටිය නොහැකි ජනතාවක් ඒ වනවිට ගොඩනැගී තිබේවි.
ජවිපෙට ජනතාව ඉදිරියේ තැබිය හැකි ආර්ථික සැලැස්මක් තිබේද?
නිසැකවම ඔව්. පසුගිය සෑම මැතිවරණයකදීම අනෙක් පක්ෂ හුදු පොරොන්දු මැතිවරණ ප‍්‍රකාශන ඉදිරිපත් කරන විට අප විසින් රට ගොඩනැගීම සඳහා වූ අපේ ආර්ථික සැලැස්ම ඉදිරිපත් කළා. අපේ රටේ ස්වභාවික සම්පත්, මානව සම්පත්, අපගේ භූගෝලීය පිහිටීම සහ ලෝකයේ ඇතිවී තිබෙන නව ආර්ථික ප‍්‍රවණතාවයන් සැලකිල්ලට ගත් ශක්තිමත් ආර්ථික සැලැස්මක් අපට තිබෙනවා. දෙවැනි ලෝක යුද්ධයෙන් පසුව අත්පත් කරගත් මහා තක්ෂණ පරිවර්තනයන් අපේ රට උකහා ගෙන නැහැ. අප නිර්මාණය කරන්නේ, දැනට පවතින පසුපසු වැටී ගාටන රට වෙනුවට ලෝක ආර්ථිකයේ චලනයන් සමග ඉදිරියට යන රටක්.
ජවිපෙ විප්ලවවාදී පක්ෂයක්. සමාජවාදී ක‍්‍රමවේදයක් තිබූ ඔබ මෙම ආර්ථික සැලසුම් ඉදිරිපත් කරන්නේ චීනයේ විදිහට ද? පරණ රුසියාවේ විදිහට ද?
අප පක්ෂයේ නිර්මාතෘ රෝහන විජේවීර සහෝදරයා කිවුවා, රුසියානු සපත්තුව අපට ලොකු වැඩියි, චීන සපත්තුව අපට පොඩි වැඩියි කියලා. ඒ නිසා අප නිර්මාණය කර ගත යුත්තේ අපේම වූ ආර්ථික සැලැස්මක්. එය අප බලය ගන්නා මොහොතේ පවතින ලෝක ආර්ථික චලනයන් තාර්කිකව තේරුම් ගනිමින් ඊට මුහුණ දෙන අපටම අන්‍යන්‍ය වූ ආර්ථික සැලැස්මක්.
ඔබලා ඉදිරිපත් කරන ආර්ථික සැලසුම් තුළ "පෝට් සිටි ව්‍යාපාරය" වැනි ව්‍යාපෘති නැතිකර දැමීමක් සිදුවේද?
අපගේ පොදු ප‍්‍රතිපත්තිය වන්නේ මෙයයි. අප බලය ගන්නා මොහොතේදී එම ව්‍යාපෘති පවතින තත්වය අනුව තීරණ ගත යුතුව තිබෙනවා. අප මේ සෑම ව්‍යාපෘතියක් පිළිබඳවම විධිමත් සමාලෝචනයක් සිදු කරනවා. එම ව්‍යාපෘතිය පවතින්නේ, කවර මට්ටමක යන්න අනුව සමහර ව්‍යාපෘති ඒ ආකාරයෙන්ම පවතින්නට දෙන අතර තවත් සමහර ඒවා වෙනස්කම්වලට භාජනය කිරීමට සිදුවනු ඇති. තවත් ඒවා මුළුමනින්ම නතර කර දැමීමට සිදුවනු ඇති.
ගසාකෑම් ගැන ඇඟිල්ල දික්වුවත්, රාජපක්ෂ පාලනය තුළ පාරවල් හැදීම සිදුවූවා. එය රටේ සංවර්ධනයට බලපාන්නක්. ජවිපෙ බලයට පත්වූ විට මෙවැනි සංවර්ධන ව්‍යාපෘති පිළිබඳව ක්‍රියා කරන්නේ කෙලෙසින් ද?
අපේ රටේ මුග්ධ අදහසක් හදන්න හදනවා, හොරකම් කළාට කමක් නැහැ පාරවල් හැදුවනේ කියලා. මේවා ජනතාවගේ සල්ලි. ඒවා හොරා කාලා ඔවුන් ඉවත්වුණත් ජනතාව ඒවා තමත් ගෙවනවා. අප ජනතාවගෙන් ඈත් වූ කොමිස් කොන්ක‍්‍රීට් වනාන්තර ගොඩනැගීමේ සංකල්පයෙන් ඉවත්වී ජනතාවගේ ජීවිතය සමග සම්බන්ධ වූ සංවර්ධන උපායමාර්ගයක් සකස් කරනවා. එහිදී ප‍්‍රමුඛතාවය වන්නේ, වර්තමානයේ මෙන් කොමිස් මුදලේ ප‍්‍රමාණය නොව ඒවා කෙතරම් ජනතාවට අවශ්‍යද යන්නයි.
මැතිවරණ වේදිකාවේදී "සමාජ ද්‍රෝහීන්" "අපරාධකරුවන්" යැයි කියූ අයට තවම දඬුවම් ලැබී නැහැ. ජවිපෙ බලයට පත්වුවහොත් එවැන්නන්ට දඬුවම් දීමක් සිදුවෙයි ද?
නිසැකවම. අපට මේ කිසිවෙකු සමග පෞද්ගලික ආරෝවක් නැහැ. අපට තිබෙන්නේ ප‍්‍රතිපත්තිමය විවේචනයක්. නීතියේ හා විධානයේ ආධිපත්‍යය යළි ප‍්‍රතිස්ථාපනය කළ යුතුයි. දැන් පවතින්නේ, ධනවත් බලවත් අයට ක‍්‍රියාත්මක නොවෙන, දුප්පත් දුර්වල අයට ක‍්‍රියාත්මක වන නීතියක්. සැබෑ ලෙසම යුක්තිය පසිඳලන නීති පද්ධතියක් අපි ස්ථාපිත කරනවා. එහිදී දැන් බේරී සිටින කිසිදු අපරාධකරුවෙකුට හෝ වංචනිකයෙකුට ගැලවීමක් නැහැ.
දඬුවම් දීම සිදුවිය යුත්තේ නීතිමය ක්‍රියාදාමයක් තුළයි. එවැනි අපරාධ වංචා සිදුකළ වුන් පිළිබඳ ජනතාව විසින් ඔබට සාක්ෂි ලබාදෙනු ඇතැයි ඔබ සිතනවාද?
අප රටේ ජනතාවගෙන් බහුතරයක් නීතිය හා සාධාරණත්වය බලාපොරොත්තු වන පුරවැසියන්. වර්තමාන ක‍්‍රියාදාමය තුළ ඔවුන් අකර්මණ්‍ය කොට අධෛර්යයට පත් කොට තිබෙනවා. මේ මොහොතේදීද ඔවුන් විශ්වාසය තබන්නේ අප කෙරෙහියි. ඉදිරිපත් කොට ඇති වැඩිම පැමිණිලි ප‍්‍රමාණය අපෙන් වීමෙන් මේ බව ඒ්ත්තු යනවා. ඒ නිසා අපේ පාලනයක් තුළ යුක්තිය හා සාධාරණය අපේක්ෂාවෙන් ජනතාව ප‍්‍රබෝධයෙන් යුතුව ඉදිරියට ඒවි.
මැතිවරණයක් සඳහා විශාල පිරිවැයක් දැරිය යුතුයි. මෙම මුදල් ජවිපෙට ලබාදෙන්නේ කවුරුද?
අනෙක් සෑම දේශපාලන ව්‍යාපාරයකටම වඩා අවම පිරිවැයක් අප මැතිවරණයක් වෙනුවෙන් දරනවා. සමහරවිට ඒ මුදල එම පක්ෂවල තනි අපෙක්ෂකයෙක් වියදම් කරන මුදලට සමාන විය හැකියි. අනෙක් අතට අපගේ දේශපාලනය සංයුක්ත වන්නේ අපට ධනය පොදි ගසා ගැනීම වෙනුවෙන් නෙමෙයි. අපි දේශපාලනය කරන්නේ පොදු ජනතාව වෙනුවෙනුයි. ඒ නිසාම මැතිවරණ කාලවලදී පමණක් නොව සාමාන්‍ය කාලවලදී පවා දේශපාලන කටයුතු වෙනුවෙන් අපට අවශ්‍ය මුදල් සම්පාදනයට දායක වන්නේ මේ රටේ ජනතාවයි.
"ජනතාව" ලබාදෙන්නේ යැයි පැවැසීමෙන් ඔබ අදහස් කරන්නේ ජවිපෙ පිළිගන්න ජනතාව සූදානම් බවද?
අනෙක් සෑම දේශපාලන පක්ෂයක් වෙතම කෙනෙක් ළං වන්නේ පෞද්ගලික ප‍්‍රතිලාභයක් අපේක්ෂාවෙනුයි. එහෙත් ජනතාව අපට සහය දෙන්නේ පොදු වුවමනාවන් වෙනුවෙනුයි. ප‍්‍රධානම වෙනස එයයි. ඒ විශ්වාසය ජනතාවට ඇති බව අප දන්නවා.
මේ රටේ මිනිසුන් පොදුවේ බැලූ විට විඥානවාදීන්, රස වින්දනයෝ හීනයි. ඔවුන් සිටින මෙම තත්ත්වය ඔබ දකින්නේ කෙසේද?
මේ පාලකයින්ට අවශය වී තිබෙන්නේ තාර්කික බුද්ධියක්, දියුණු චින්තනයන් සහිත මිනිසුන් නෙමෙයි. ඒ නිසා ඔවුන් විසින් විවිධ මිත්‍යාවන් සහ බාල රසවින්දනයක් සමාජ ගත කරනවා. එයට පොදු සමාජය යම් පමණකට ගොදුරුවී තිබෙනවා. නමුත් අපේ උත්සාහය දියුණු මිනිස් චින්තනයක් සහිත සමාජයක් බිහිකර ගැනීමයි.
මාක්ස්වදී ක‍්‍රමය යටතේ රස වින්දනය හීනකරන බවයි, ජනතාවගේ අදහස. මේ ගැන ඔබ දකින්නේ කෙලෙසින්ද?
මාක්ස්වාදයට එරෙහි සතුරන් විසින් එවැනි මතයක් ඇති කොට තිබෙනවා. එහෙත් එය ඇත්තක් නෙවෙයි. සෝවියට් දේශය බිහිවීමෙන් පසුව දියුණු සාහිත්‍යයක් බිහිවුණා. එහෙත් සමහර විට සෝවියට් දේශය තුළ කලාව සහිත්‍යය පාලනයට සම්බන්ධ ඇතැමෙකුගේ ක‍්‍රියාකාරිත්වය ඔබ නගන තර්කයකට පදනම සපයන්න ඇති. එහෙත් රසවින්දනයට සැබෑම බාධාව තිබෙන්නේ දැනට පවතින සමාජ ආර්ථික ක‍්‍රමය තුළයි. මිනිසුන්ගේ ජීවිතවලින් කලාව රසවින්දනය හිතාමතාම ඈත් කොට තිබෙනවා. පවතින ආර්ථිකය තුළ චිත‍්‍රපටයක්, ගීතයක්, නාට්‍යයක් බැලීම සඳහා අමතර පිරිවැයක් දරන්න ඔවුනට හැකියාවක් නැහැ.
ජනතා විඥානය දියුණු කිරීමට ජවිපෙ කටයුතු කිරීමට සිතන්නේ මොන අන්දමින් ද?
ලෝකයේ දියුණුම සාහිත්‍ය කලා නිර්මාණ අපි දැනටත් අධ්‍යාපන අරමුණින් පක්ෂය තුළ සාමාජිකත්වය සමග සාකච්ඡුාවට ගන්නවා. ඇත්තටම ජවිපෙ පාලනයක් තුළ ජනතාවගේ කලා සාහිත්‍ය රසවින්දනය උසස් කරවීමත් මිත්‍යාව සම්බන්ධ ආකල්ප වෙනස් කිරීමත් ඉලක්ක කරගනිමින් විශාල වැඩකොටසක් කළ හැකියි. ඒ සඳහා තාක්ෂණයේ දියුණුකම් නිසැක ලෙසම පාවිච්චියට ගත හැකි වේවි. අපට අවශ්‍ය දියුණු මිනිසෙක්.
ජවිපෙ විසින් අතීතයේ කළ වරදක් හෝ ජවිපෙ වෙතින් සිදුවන වරදක් ගැන යම් කලා නිර්මාණයක් ඉදිරිපත් වුවහොත්, වාරණයකින් තොරව එවැනි නිර්මාණයකට ජවිපෙ පාලනයක් තුළ ඉඩ ලැබෙනු ඇති ද?
ඇත්තටම ඔය ප‍්‍රශ්නය අනියමාර්ථයේ අසම්භාව්‍ය ගණයේ එකක්. ජවිපෙ ප‍්‍රතිපත්තිය ඉතා පැහැදිලියි. කලාකරුවන්ගේ ආත්ම ප‍්‍රකාශනයන් ඉදිරිපත්කිරීමට කිසිදු බාධාවක් පැනවීමට අපේ බලාපොරොත්තුවක් නැහැ.
චන්ද්‍රිකා කුමාරතුංග රජය යටතේ "ජවිපෙ" වැඩි පිරිසක් සිටි අතර "රිමෝට්" එක තම අතේ බව පැවැසුවා. නමුත් එයින් කිසිවක් නොකිරීම තුළ ජනතා විශ්වාසය බිඳ වැටුණා නොවේද?
ඉතිහාසය හොඳින් අධ්‍යයනය කරන්නෙකුට මේ පිළිබඳව ගැටලුවක් මතුවන එකක් නැහැ. සැබැවින්ම ඉතිහාසයේ ඒ ඒ අවස්ථාවලදී අපට පවරන ලද කාර්යභාරය අපි හොඳින් ඉටුකර තිබෙනවා. කලින් කිවුවා වගේම ජනතාවට අප පිළිබඳ විශ්වාසය බිඳවැටීමක් සිදුවී නැහැ. මැතිවරණ තුළ අප පිළිබඳ ඇති කැමැත්ත නිරූපනය නොවීම වෙනම කාරණයක්.
