නවින්ගේ නියෝග අනුව වැටලීම් කළත් පොල් සංවර්ධන මණ්ඩලයේ සභාපතියා මිලියන ගණනින් ජරාව කා නයිට්රේට් ඝාතකයන් මුදා හැරලා..! -හෙළිදරව්ව
https://www.lankaenews.com/news/9482/si
Udaya-Rupasinghe-LeN-03.07.2019
(ලංකා ඊ නිව්ස් -2019.ජූලි.03, පෙ.ව.10.35) ඇමැති නවින් දිසානායකගේ නියෝග මත පරිසරයට කැල්සියම් නයිට්රේට් විෂ මුදා හරින 'නයිට්රේට් ඝාතකයන්' අල්ලා ගත් නමුත් පොල් සංවර්ධන මණ්ඩලයේ දූෂිත සභාපතියා ඔවුන්‌ගෙන් මිලියන ගණනින් ජරාව කා සිද්ධිය යට ගසා දමා ඇති පුවතක් ලංකා ඊ නිව්ස් වෙත වාර්තා වේ.
ලංකාවේ කොහුබත් ආශ්‍රිත කර්මාන්තයේ නියැලී සිටින විදේශ ආයෝජකයන් කැල්සියම් නයිට්රේට් බහුලව භාවිතා කරමින් නයිට්රේට් විෂ මුසු අපවිත්‍ර ජලය පරිසරයට මුදා හරින බව පසුගිය මාර්තු මාසයේදී ලංකා ඊ නිව්ස් හි පළ කළ "දේශීය කොහු කර්මාන්තයේ අභාවය සහ නයිට්රේට් ඝාතකයා සිරිසේන" නම් ලිපියෙන් අප සවිස්තරාත්මකව හෙළිදරව් කෙළෙමු.
වැටලීම කරයි; බඩුත් මාට්ටු; ඒත්...
අපගේ ඉහත කී ලිපියෙන් පසු ඒ පිළිබඳව කරුණු දැනගත් වැවිලි කර්මාන්ත ඇමැති නවීන් දිසානායක මහතා එම අපද්‍රව්‍ය මුදාහරින කර්මාන්ත ශාලා වටලා නීතිය ක්‍රියාත්මක කරන ලෙස පොල් සංවර්ධන මණ්ඩලයේ සභාපති උදය රූපසිංහට නියෝග කෙළේය. ඒ අනුව මෙයට සති දෙකකට පෙර දුම්මලදෙණිය, අප්පුහාමි නැමැත්තෙකුගේ කර්මාන්ත ශාලාවක් වටලන ලද්දදේ ය. ඊට පොලිස් නිලධාරීන්, මධ්‍යම පරිසර අධිකාරියේ නිලධාරීන්, පොල් සංවර්ධන මණ්ඩලයේ සභාපතිවරයා ඇතුළු පිරිසක් සහභාගි වූහ.
එහිදී ලංකා ඊ නිවුස් පළ කළ පුව‌තේ සඳහන් පරිදිම කිසිදු ආරක්ෂිත ක්‍රමවේදයක් නොසලකා කැල්සියම් නයිට්රේට් දමා කොහුබත් පිරිසිදු කරමින් සිටි කර්මාන්තකරුවෙකු අතටම අල්ලාගත හැකිවිය. ඒ වන විටත් පාවිච්චි කරන ලද කැල්සියම් නයිට්රේට් බහාලූම් 50 ක් පමණ ගොඩගසා තිබුනු අතර වැඩිදුර ප්‍රශ්ණ කිරීමේදී එම කොහුබත් පිරිසිදු කිරීමෙන් පසු UK Coco Green Lanka (Pvt) Ltd නැමැති එංගලන්ත සමාගමකට සපයන බව හෙළිවිය.
ඒ මොහොතේදී එම කර්මාන්ත ශාලව අවට අසල්වාසීන්ගෙන් විමසූ පසු ඔවුන් පරිභෝජනය කරන ජලයේ පැහැය වෙනස් වී ඇති බවත්, ජලයේ අමුතු රසක් දැනෙන බවත් ප්‍රකාශ කළ අතර මධ්‍යම පරිසර අධිකාරියේ නිලධාරීන් විසින් එම ජලධර වලින් ජල නියැදි වැඩිදුර පරීක්ෂණ සඳහා ලබා ගත්තේ ය. අල්ලා ගත් කර්මාන්තකරු කියා සිටියේ නයිට්රේට් මිශ්‍රිත අප ජලය පරිසරයට මුදාහැරීම පිළිකා ඇතිකිරීමට මූලික හේතුවක් වන බවත්, නිල්දරු උපත් සිදුවීම හෝ ශරීරයට අහිතකර බවත් තමා නොදැන සිටි බවයි.
තවද කැල්සියම් නයිට්රේට් පොහොරක් පමණක් බව සහ එයින් කිසිදු අහිතකර ප්‍රතිඵලයක් සිදුවන බව එංගලන්ත සමාගම නොපැවසූ නිසා තමා එය භාවිතා කළ බවද කර්මාන්ත කරු කියා සිටියේ ය.
සභාපතිතුමා කියන ඔ්නෑම දෙයක් කරන්නම්...
පසුව මෙම කර්මාන්තකරු පොල් සංවර්ධන මණ්ඩලට කැඳවන ලද අතර එහිදී ඔහු පවසා සිටියේ තමන් අතීතයේදී Botanicoir නැමැති එංගලන්ත සමාගමට කැල්සියම් නයිට්රේට් යොදා පිරිසිදු කරන ලද කොහුබත් සැපයූූ බවත්, වර්තමානයේ තමා UK Coco Green සමාගමට එම කොහුබත් ලබා දෙන බවයි. එමෙන්ම අතීතයේදී මෙන්ම වර්තමානයේදීත් අදාල කැල්සියම් නයිට්රේට් එම සමාගම් විසින් තමාට ලබා දුන් බවද හේ පැවසීය. එමෙන්ම තමන්ට නඩු නොපරවන ලෙසත් සභාපතිතුමා කියන ඕනෑම දෙයක් කිරීමට තමා සහ UK Coco Green සමාගම සූදානම් බවත් ඔහු වැඩිදුරටත් පැවසීය.
මෙයට කලකට ඉහතදී මෙම සභාපතිවරයාම චක්‍ර ලේකයක් නිකුත් කරමින් නීති විරෝධීව කැල්සියම් නයිට්රේට් පාවිච්චි කර අප ජලය ලෙස ඉවත දමන හෝ එසේ කිරීමට අනුබල දෙන හෝ යම්කිසි ව්‍යාපාරයක් අසු වුවහොත් ඔවුනට නීතිය ක්‍රියාත්මක කරනවා පමණක් නොව ඔවුන්ගේ අපනයන බලපත්‍රය පවා තහනම් කරන බව නමුත් 'ඕනෑම දෙයක් කිරීමට තමා සහ UK Coco Green සමාගම සූදානම්' යැයි කී කතාව අනුව දූෂිත සභාපතියාගේ මොළය ජරාවක් කෑමේ නොතිත් ආශාවෙන් පිරී ගියේ ය.
ලක්ෂ 100 ක් ජරාව ඉල්ලයි; 50 කට එකඟ වෙයි...
ලංකා ඊ නිව්ස් පෙර ලිපි වලින් ද හෙළි කළ පරිදි අති දූෂිතයෙක් වන පොල් සංවර්ධන මණ්ඩලයේ සභාපති උදය රූපසිංහ UK Coco Green සමාගමට කථාකර කියා සිටියේ තමාට ඔවුන්ගේ අපනයන බලපත්‍රය ඒ මොහොතේම තහනම් කළ හැකි බැවින් එසේ නොකිරීමට නම් රු. ලක්ෂ 100 ක් වටිනා විදේශ මුදලක් ඔවුන්ගේ එංගලන්ත සමාගම හරහා තම තායිලන්තයේ ඇති ගිණුමකට තැන්පත් කරන ලෙසයි. අවසානයේ රු. ලක්ෂ 100 රු. ලක්ෂ 50 ක් දක්වා අඩු වූ අතර මුදල ඔහුගේ ගිණුමට බැර කිරීමට එකඟ විය. ඒ අනුව කර්මාන්තකරු මුදා හැර සියළු දේ යට ගැසීමට උදය රූපසිංහ ක්‍රියා ක‌ෙළේ ය. උදය රූපසිංහ මිලියන 5 ක ජරාවක් කෑ බව ඒ වැටලීමට එක්වූ අනෙකුත් නිලධාරීන් මේ වන විට දැනගෙන හමාරය.
ඇමැතිට ජනාධිපතිට වචනයක්...
නවීන් දිසානායක ඇමතිවරයාට අපට කීමට ඇත්තේ එක දෙයකි.
ඔබගේ පොල් සංවර්ධන මණ්ඩලයේ සභාපතියා UK Coco Green සමාගමෙන් රු. මිලියන 5 ක මුදලක් ජරාව කෑ වග තවමත් ඔබ නොදන්නවා විය හැකිය. නමුත් වැඩි කලක් යාමට පෙර තමා එම මුදල ලබා ගත්තේ ඇමතිතුමා කියූ නිසා බවත්, එය ඇමති තුමාගේ ඉදිරි ඡන්ද කටයුතු වලට වියදම් කිරීමට ලබා ගත් බවත් උදය රූපසිංහ සභාපතියා පැවසීමට බැරි නැත. එවිට ඔබට සිදුවන්නේ කුමක්දැයි අප කිව යුතු නැත. එම නිසා මේ පිළිබඳව කල් තියා සොයා බලා සභාපති උදය රූපසිංහට සහ එම කර්මාන්තකරුවාට එරෙහිව නීතිය ක්‍රියාත්මක කරන මෙන් අපි ඔබෙන් ඉල්ලා සිටිමු.
එමෙන්ම පරිසරය විනාශ කිරීමට උඩගෙඩි දෙන නිළධාරීන්ට තරා තිරම නොබලා දඬුවම් දෙනවා යැයි දිවා රෑ නොබලා හැමවිටම කෑ මොර දෙන පරිසර ඇමති, ජනාධිපතිවරයාටද කිව යුත්තේ එක් දෙයකි. දැන් එවැනි සභාපතියෙකු අතටම අසු වී ඇත. සභාපතිවරුන් පත් කරන්නේ ද ජනාධිපති ය. ඔබ කියන නීතිය ඔහුට එරෙහිව ක්‍රියාත්මක වනතුරු අපි බලා සිටිමු. නැත්නම් විදේශ ආයෝජකයින්ට රිසි සේ දේශීය පරිසරය විනාශ කිරීමට පමණක් නොව ඉපදීමට සිටින ජාතියේ දරුවන් නිල්දරුවන් ලෙස ඉපදී ඔවුන් මියයාමට සලස්වා මානව සංහතියට එරෙහි දරුණු අපරාධයකට වගකිව යුතු ලෝකයේ එකම ජනාධිපතිවරයා ලෙස ඔබ හංවඩු ගැහෙන අතර එසේ මියයන සියළු දරුවන්ගේ මරණ වලට වගකිව යුතු නායකයෙකු ලෙසට ඔබට දඬුවම්ද හිමිවනවා නොඅනුමානය.
-ලංකා ඊ නිව්ස් විශේෂ වාර්තා කරුවෙකු විසිනි-
සබැඳි පුවත
දේශීය කොහු කර්මාන්තයේ අභාවය සහ නයිට්රේට් ඝාතකයා සිරිසේන
---------------------------
by (2019-07-03 05:22:25)
µµµµµµµµµµµµµµµµµµµµµµµµµµµµµµµµµµµµµµµµµµµµµµµµµµµµµµµµµµ
දේශීය කොහු කර්මාන්තයේ අභාවය සහ නයිට්රේට් ඝාතකයා සිරිසේන
පාරම්පරික කොහු කර්මාන්තකරුවෙකු කරන හෙළිදරව්වක්
https://lankaenews.com/news/9033/si
Naitrate-Murderer-LeN-08.03.2019
(ලංකා ඊ නිව්ස් -2019.මාර්තු.08, ප.ව.7.30) ශ්‍රී ලංකාවට විදේශ ආයෝජකයන් ගෙන්වා ගැනීමට පැවති ආණ්ඩු වලට දැඩි වුවමනාවක් තිබූ අතර එම ආණ්ඩු වල අරමුණ වූයේ ඕනෑම විදේශ ආයෝජකයෙකුට ලංකාවේ ආයෝජනය කිරීමට සලස්වා ලංකාවට විදේශ විනිමය ගෙන ඒමට උනන්දු කරවීමයි.
නමුත් මෙම ආයෝජකයන් දේශීය අයෝජන තුල තිබෙන නීති රීති, දුර්වලතා හොඳින් අධ්‍යයනය කර ඒවායේ උපරිම ප්‍රතිඵල ගැනීමට ශ්‍රී ලංකාවට පැමිණි අතර ඔවුනට ඔවුන්ගේ බලාපොරොත්තු ඉස්තරම්ම අයුරින් ඉටුකර දීමට දේශීය බළධාරීහු ද කැපවී සිටියහ.
ලොව කිසිදු රජයක් නොකරන දේ අපේ අය කළා
ලොව කිසිදු රජයක් තම දේශීය ව්‍යාපාර විදේශ ආයෝජකයන් අතට පත් කිරීමට සැලසුම් සකස් නොකරයි. නමුත් ශ්‍රී ලංකා රජය මගින් විදේශ ආයෝජකයන්ට අසීමිත ව්‍යාපාර නිදහසක් භුක්ති විඳීමට ඉඩ සලසා ඇත. එම අසීමිත ව්‍යාපාර නිදහස හේතුවෙන් දේශීය ව්‍යාපාර විදේශ ආයෝජකයන් අත්පත්කර ගනිමින් දේශීය ව්‍යාපාරිකයන්ගේ මිනී පෙට්ටි වලට ඇණ ගසන්නට ඔවුන්ට වැඩි කලක් ගත නොවුනි.
මෙයට හොඳම උදාහරණය නම් දේශීය කර්මාන්තයක් වන කොහුබත් හා කොහුමෝල් කර්මාන්තය දිනෙන් දින විදේශීය ආයෝජකයන් අතට පත්වීම ය. ඒවාට අනුබල දීමට රජයේ ආයතන වල දූෂිත නිළධාරීන් තම සියළු සැලසුම් සකස් කරන්නේ විදේශීය සල්ලි කුට්ටි වලට කෑදරකමිනි.
ජනාධිපති රැකවරණය යටතේ සමන්ලා
BOI අනුමැතිය ලත් විදේශීය ආයෝජකයන් වෙනුවෙන් නීත්‍යානුකූල නොවන කටයුතු නීත්‍යානුකූල ලෙස කර දීමට BOI ආයතනයේ බණ්ඩාර නැමති නිළධාරියාත්, වයඹ පරිසර අධිකාරියේ සමන් කුමාර ලේනදූව නැමති නිළධාරියාත් (සමන් සේනානායක විශ්‍රාම ගිය පසුව පැමිණි නිලධාරියා) හා ITI ආයතනයේ නිළධාරීන් ක්‍රියා කරති. මෙම දූෂිත ක්‍රියාවන්ට අත්තිවාරම දමන ලද්දේ වයඹ පරිසර අධිකාරියේ හිටපු සභාපති සහ හිටපු වයඹ මහ ඇමතිගේ පරිසර උපදේශක තනතුර දරණ සමන් සේනානායක ය.
මධ්‍යම පරිසර අධිකාරිය ගැන වචනයක් හෝ සඳහන් කිරීමෙන් ඵලක් නැත. මෙම දැවැන්ත පරිසර විනාශය වැලැක්වීමට හැකි නිළධාරීන් ඔවුන් වන නමුත් මෙම විනාශයට එරෙහිව කිසිදු කටයුත්තක් නොකරන්නේ වයඹ පරිසර අධිකාරියට ඇති බිය නිසාය. යහපාලන ආණ්ඩුව බලයට පත්වූ විගසම මේ සම්බන්ධයෙන් ක්‍රියාමාර්ගයක් ගනීවි යැයි බලාපොරොත්තුවක් අපට තිබුනත් ඒ විනාශයන් පැවති ආණ්ඩුවටත් වඩා දස ගුණයකින් පමණ වැඩිවී ඇත්තේ මෙම දූෂිත නිළධාරීන්ට ඇති නිදහස හා පරිසර ඇමැති වූ ජනාධිපතිවරයාගෙන් ඇති රැකවරණය තව තවත් වැඩි වී ඇති නිසාවෙනි.
ව්‍යසනය දෙආකාරයකි
රාජ්‍ය අධිකාරීන් මඟින් මෙම පරිසර ව්‍යවසනය දෙයාකාරයකට සිදුවීමට ඉඩහැර ඇත. එනම් පාරම්පරික කොහු කර්මාන්තකරුවන් සම්පූර්ණයෙන්ම අභාවයට යැවීම සඳහා මහා පරිමාන යන්ත්‍ර සූත්‍ර ආනයනය කිරීමට අවශ්‍ය සියළුම පහසුකම් සපුරා දීම සහ කැල්සියම් නයිට්රේට් නැමති රසායනික ද්‍රව්‍ය සීමා රහිතව ආනයනය කර කොහුබත් හා කොහු කැබලි පිරිසිදු කර නයිට්රේට් මිශ්‍රිත අපජලය පරිසරයට මුදාහරිමින් පරිසරයට කිසිදු අනතුරක් නැතැයි ව්‍යාජ වාර්තා ඉදිරිපත් කිරීමය.
අද ලංකාවේ දකුණු දිග හා වයඹ ප්‍රදේශයන්හි කොහු කර්මාන්ත විශාල සංඛ්‍යාවක් වැසී ඇති අතර මෙම මහා පරිමාන යන්ත්‍ර සූත්‍ර කුඩා පරිමාණ කොහු කර්මාන්ත ගිලගනිමින් සිටී. නෙදර්ලන්ත සමාගමක් වන Euro Substrate Growrite සහ එංගලන්ත සමාගමක් වන Botanicoir යන ආයතන තම අනසක ලංකාව පුරාම විහිදුවමින් දිනකට පොල්ලෙලි 50,000 කට අධික ප්‍රමාණයක් කැපිය හැකි මහා පරිමාණ යන්ත්‍ර සූත්‍ර ආනයනය කර බිංගිරිය ඇතුළු ශ්‍රී ලංකාවේ ප්‍රදේශ රැසක තම ව්‍යාපර ව්‍යාප්ත කර ඇත. මහා පරිමාණයෙන් අධික මිලට පොල්ලෙලි මිලදී ගනිමින් අමුද්‍රව්‍ය නිපදවා ගන්නා මෙම සමාගම් සමග තරඟ කිරීමට නොහැකිව දේශීය කර්මාන්තකරුවෝ තම කර්මාන්ත දිනෙන් දිනම වසා දමමින් සිටිති.
කැල්සියම් නයිට්රේට්
පාරම්පරිකව කොහුබත් කර්මාන්තයේ නියැලී සිටි දේශීය ව්‍යාපාරිකයින් කොහුබත් හෝ කොහු කැබලි පිරිසිදු කිරීමට රසායනික ද්‍රව්‍ය යොදා ගත්තේ නැත.
________________________________________________________________
BOI හි අනුමැතිය ලත් ආයෝජකයෙකු ලෙස ශ්‍රී ලංකාවට පැමිණි නොර්වේ රාජ්‍යයේ හි ලියාපදිංචි “ජිෆී ප්‍රොඩක්ට්ස් සමාගම” ප්‍රථමයෙන්ම මහා පරිමානයෙන් කැල්සියම් නයිට්රේට් භාවිතය ආරම්භ කරන ලදී. ඔවුන්ට පසුව පැමිණි එංගලන්තයේ ස්ථාපිත ‘බොටැනිකොයා සමාගම’ සහ 'කොකෝ ග්‍රීන් යූකේ සමාගම', ප්‍රංශයේ ස්ථාපිත ‘බයොග්‍රෝ සමාගම’ සීමා රහිතව කැල්සියම් නයිට්රේට් ටොන් ගණනින් ආනයනය කරමින් ලංකාවේ දැදුරු ඔය, මා ඔය, ගල් ඔය හා රාජාංගනය වැව ඇතුළු ජල පෝෂක කලාප වලට කැල්සියම් නයිට්රේට් මිශ්‍රිත අප ජලය මුදා හරිමින් දැවැන්ත පරිසර විනාශයක් කරමින් සිටිති.
Jiffy Products, une société enregistrée en Norvège, est arrivée au Sri Lanka en tant qu'investisseur agréé par la BOI et a commencé à utiliser du nitrate de calcium. Après eux, la société britannique Botanicoya et la société française Coco Green UK, la société française Biogro, ont importé en quantité illimitée des tonnes de nitrate de calcium dans les bassins versants du Sri Lanka, notamment Deduru Oya, Ma Oya, Gal Oya et le lac Rajanganaya. Le rejet d'eaux usées riches en nitrates provoque une dégradation massive de l'environnement.
Jiffy Products, a registered company in Norway, came to Sri Lanka as a BOI Approved Investor and first started using calcium nitrate. After them, the UK's Botanicoya Company and Coco Green UK Company, France's Biogro Company, unlimitedly imported tons of calcium nitrate to the catchment areas of Sri Lanka including Deduru Oya, Ma Oya, Gal Oya and Rajanganaya Lake. The release of nitrate-rich wastewater is causing massive environmental degradation.
________________________________________________________________
මෙම සමාගම් යුරෝපා සංගමයේ සාමාජික රටවල ස්ථාපිත කර බැවින් යුරෝපා සංගමයේ නීති රීති වලට 100% ක් අනුකූලව කටයුතු කළ යුතු වන අතර මෙලෙස නයිට්රේට් මිශ්‍රිත අප ජලය පරිසරයට මුදා හැරීම හෝ වෙනත් පරිසර විනාශයන් සිදු කළහොත් එම ආයතන වලට දඩ ගැසීමට හෝ වසා දැමීමට යුරෝපා සංගමය කටයුතු කරයි. නමුත් ශ්‍රී ලංකාවේදී මොවුහු ඒ පිළිබඳව කිසිදු සැලකිල්ලක් නොදක්වති.
පොහොර ලේකම් කාර්යාලය සහ ආරක්ෂක අමාත්‍යාංශය බුදි
මෙම කර්මාන්ත කරුවන් ඔවුන්ගේ නම් වලට සහ ඔවුන්ගේ හිතවතුන්ගේ නම් වලට ද යුනිෆවර් නම් ආයතනයක් හරහාද කැල්සියම් නයිට්රේට් මහා පරිමාණයෙන් ලංකාවට ගෙන්වති. මෙහි පුදුමය නම් මෙම කැල්සියම් නයිට්රේට් ලංකාවට ගෙන්වීමට අවසර දෙන පොහොර ලේකම් කාර්යාලයට හෝ ආරක්ෂක අමාත්‍යංශයට මේ ක්‍රියාවලිය පිළිබඳව කිසිදු දැනීමක් හෝ ඒ පිළිබඳව කිසිදු පරීක්ෂාවක් කිරීමට අවශ්‍යතාවක් නොමැති වීමය. මෙම රසායනිකය ගෙන්වීමට අනුමැතිය දෙන පුද්ගලයන්ට රුපියල් කෝටි ගණනින් අල්ලස් ලැබෙන අතර කැල්සියම් නයිට්රේට් ලංකාවට මහා පරිමාණයෙන් ගෙන්වීමට අවසර දෙන්නේ කුමක් නිසා දැයි විමසුවහොත් ඔවුන්ගේ පිළිතුර වනුයේ ඉහළින් එන නියෝග මත මෙලෙස සිදු කරන බවයි.
කැල්සියම් නයිට්රේට් රසායනික පොහොර වසරකට මෙට්‍රික් ටොන් 2000 කට වැඩි ප්‍රමාණයක් ගෙන්වන බවට වාර්තා වේ. ලියකියවිලි වලට පමණක් පොහොර ලෙස ගෙන්වන මෙම රසායනිකයෙන් 90% කට වැඩි ප්‍රමාණයක් භාවිතා කරන්නේ කොහුබත් සේදීමේ ක්‍රියාවලිය සඳහායි. මෙමගින් සිදු කරනුයේ කොහුබත් හෝ පොල්ලෙලි කැබලි ටැංකි වල දමා ඉන්පසු කැල්සියම් නයිට්රේට් රසායනිකය දමා ජලය යොදා හොඳින් මිශ්‍ර කර එම ක්‍රියාවලියෙන් ඉවත් වන නයිට්රේට් මිශ්‍රිත අප ජලය පිරිපහදුවකින් තොරව ස්වභාවික පරිසරයට මුදා හැරීමය. මෙම නයිට්රේට් අද වන විට මිනිස් ජීවිත වලට විශාල සෞඛ්‍යය තර්ජන එල්ල කරන මූලික සාධකයක් බවට පත්වී ඇත.
පිළිකා රෝගීන් සඳහාම බස් රථයක් දැම්මේ ඇයි?
වයඹ පළාතේ නිකවැරටිය, මහව, ගල්ගමුව, දිවුලපිටිය, පොල්පිතිගම, කුලියාපිටිය, නාගොල්ලාගම, සහ උතුරුමැද පළාතේ රාජංගනය ආදී ප්‍රදේශ වල මහා පරිමාණයෙන් කැල්සියම් නයිට්රේට් රසායනිකය භාවිතාකර කොහුබත් සේදීමේ ක්‍රියාවලිය සිදු කරයි. දුෂ්කර ගම්මාන වල දිළිඳු ජනතාවට මේ පිළිබඳව කිසිදු අවබෝධයක් නොමැති අතර ඔවුන්ට මෙසේ තම අමුද්‍රව්‍ය කැල්සියම් නයිට්රේට් රසායනිකය යොදා සෝදා දීමෙන් ලැබෙන ආදායම දෙගුණ වන නිසාවෙන් තමන්ගේ ජල සම්පත් ප්‍රයෝජනයට ගනිමින් මෙම ක්‍රියාවලිය සිදු කරමින් සිටී. සාමාන්‍යයෙන් අප පරිභෝජනය කරන ජලධරයේ නයිට්රේට් අගය ලෝක සෞඛ්‍ය සංවිධානයේ දත්තයන්ට අනුව 10 ppm වඩා අඩු අගයක තිබිය යුතු වුවත් දැන් මෙම නයිට්රේට් මිශ්‍රිත අප ජලය නිසා එම ප්‍රදේශ වල ජලයේ නයිට්රේට් ප්‍රතිශතය විශාල ලෙස ඉහළ ගොස් ඇත.
මෙම ජලය පරිභෝජනයෙන් සිදු වන විශාලතම සෞඛ්‍ය ව්‍යසනය නම් නිල්දරු උපත් (Blue Baby Syndrome) සිදු වීමයි. මෙහිදී ළදරුවන්ගේ උපරිම ආයු කාලය මාස 6 කට සීමා වේ. මේ සඳහා මෑතකදී සිදු වූ හොඳම උදාහරණයක් ලෙස කුලියාපිටිය, උඩුබද්දාව ප්‍රදේශයේ නිල් දරු උපතක් සිදු වී එම දරුවා මාස 6 කට පසුව මිය යාමයි. තවද උපත් දෝෂ, අයිඩීන් අවශෝෂන නිශේධකයක් ලෙස කියාකර තයිරොයිඩ් ග්‍රන්තියේ ආසාදන ද ඇතිකරවන අතර මෙම නයිට්රේට් මිශ්‍රිත ජලය පරිභෝජනයෙන් ශ්වාසනාල ආශ්‍රිත මාරාන්තික පිළිකා, චර්ම පිළිකා ද ඇතිකරවයි. අද ලංකාවේ පිළිකා රෝගීන් විශාල ලෙස ඉහළ ගොස් ඇත.
මෑතකදී නිකවැරටිය ප්‍රදේශයේ සිට මහරගම පිළිකා රෝහල කරා පිළිකා රෝගීන් සඳහාම බස් රථයක් වෙන් කර ඇත්තේ ක්ෂණිකව පිළිකා රෝගීන්ගේ වැඩී වීමක් දක්නට ලැබුනු නිසාවෙනි. ලංකාවේ කිසිම ආයතනයක් හෝ සෞඛ්‍ය අමාත්‍යාංශයවත් මේ දක්වා මෙම ප්‍රදේශ වල පිළිකා රෝගීන් වැඩි වීමට හේතුව සොයා නැත. වසර 9 ක් පුරා මේ ප්‍රදේශ වල ජල පෝෂක වලට මුදාහරින නයිට්රේට් මිශ්‍ර ජලය පානය කිරීම නිසා මොවුන් බොහෝ දෙනෙක් මෙසේ පිළිකා රෝගයට ගොදුරු වී ඇති බවට සැකයක් නැත. මෙමගින් සිදුවනුයේ රටේ අනාගත පරපුර බුද්ධියෙන් හීන, කායික හා මානසික වශයෙන් දුර්වල අනාගත පරපුරක් බිහිවීමයි.
ස්වර්ණභූමිය විෂ ගබඩාවක් කරන්නේ ඇයි?
තුන්වන ලෝකයේ රටක් වුවද දැනට අප රටේ සාක්ෂරතාවය 92% කි. අනාගතයේ මෙය නියත වශයෙන්ම පහත වැටෙනු ඇත. මෙයට වගකිව යුත්තේ කවුරුන්ද?. රටේ ඉහළ නිළධාරීන්ට මෙම ව්‍යසනයන් නොපෙනෙන්නේ මන්ද?. නැතහොත් ඔවුන් උගතුන් හෝ බුද්ධිමතුන් නොවේද?. ලොව අන් රටවල නයිට්රේට් ප්‍රතිචක්‍රීකරණය නොකර ස්වභාවික පරිසරයට මුදා හැරීම නීතියෙන් තහනම් වන නමුත් අප රටේ දිළිඳු ජනතාව පිටරැටියන්ගේ සුඛවිහරණය උදෙසා ඔවුනට සුපිරිසිදු නිෂ්පාදනයක් ලබා දෙන්නේ ස්වභාවික සෞන්දර්යයෙන් අනූන අපගේ ස්වර්ණභූමිය විෂ අපද්‍රව්‍ය ගබඩාවක් කරමිනි.
පස සහ ස්වාභාවික ජලධර ආරක්ෂා කිරීම උදෙසා පොහොර භාවිතය සීමා කිරීමට වත්මන් ආණ්ඩුව ක්‍රියාමාර්ග ගෙන ඇති මුත් පොහොරක් ලෙස විශාල ප්‍රමාණයෙන් ආනයනය කර කොහුබත් සේදීමේ ක්‍රියාවලියකට යොදාගන්නා නයිට්රේට් බහුල මෙම රසායනික ද්‍රව්‍ය ගැන කිසිවෙකු කතා නොකරයි.
විදේශිකයන් ශ්‍රී ලංකාවේ පොල්ලෙල්ලට පෙම් බැන්දේ ඇයි?
මෙම විදේශ ආයෝජකයන් ශ්‍රී ලංකාවේ පොල්ලෙල්ලට මේ තරම් පෙම් බැඳීමට හේතුවක් ඇත. ලොව පුරා වේගයෙන් පැතිරී යන පස් නොවන වගා මාධ්‍යන් අතරින් ශ්‍රී ලංකාවේ පොල්ලෙල්ලෙන් නිපදවන වගා මාධ්‍යයෙන් ලොව පුරා වගාකරුවන් ඉහළම ඵලදාවක් ලබා ගන්නා බැවිනි. වෙන කිසිදු රටක පොල්ලෙල්ලට මෙවන් ගුණාත්මක භාවයක් නොමැත. එම නිසා දේශීය පාරම්පරික කර්මාන්තය ජාත්‍යන්තරයට ගෙන යාමට දේශීය ව්‍යාපාරිකයින් අසමත්වීම මත විදේශ ආයෝජකයන් මෙම කර්මාන්තය බූවල්ලෙකු සේ ලංකාව පුරාම තම අනසකට නතුකර ගනිමින් සිටිති. ලංකාවේ අති දූෂිත නිළධාරීන් සිටිනා තුරා විදේශ ආයෝජකයන්ට කිසිම බාධාවක් නොමැත.
ශ්‍රී ලංකාවේ පොල්ලෙල්ලට ඇති වටිනාකම මෙම ආයෝජකයන් හොඳින් දන්නා අතර අපේ පොල්ලෙල්ලේ වැඩිම ආදායම් ලබන රටවල් බවට නෝර්වේ, එංගලන්තය, ප්‍රංශය, නෙදර්ලන්තය, ඕස්ට්‍රේලියාව, චීනය සහ ස්පාඤ්ඤය පත්වී ඇත. විදේශ රටවලට නොව ඩොලර් බිලියන ගණනක ණය බරක සිරවී සිටින අප, දේශීය ස්වභාවික සම්පතක් වන පොල්ලෙලි ආශ්‍රිත නිෂ්පාදන ව්‍යාපාර නගා සිටුවා දේශීය කර්මාන්තකරුවන් ශක්තිමත් කරන අතරම එම නිෂ්පාදන අපනයනයෙන් ලංකාවට දැවැන්ත විදේශ විනිමය ප්‍රමාණයක් ගෙන ඒමට සැලසුම් සැකසුවහොත් එය දේශීය ආර්ථීකයට විශාල පිටුවහලක් වනු නොඅනුමානය.
දූෂිත උදය රූපසිංහ
සියළු ව්‍යවසනයන් සිදු වීමට ඉඩහැර වසර 3කට ආසන්න කාලයක් පොල් සංවර්ධන මණ්ඩලයේ සභාපති ධූරය දරණ උදය රූපසිංහ නැමති දූෂිත නිළධාරියා ඇසූ කන් නෑසුනාක් මෙන් සිටියි. පොල් සංවර්ධන මණ්ඩලයේ සභාපති වශයෙන් ඔහු සිදු කළ යුත්තේ දේශීය කර්මාන්තකරුවන් නඟාසිටුවීමට අවශ්‍ය සියළු පහසුකම් සපයා දීම විනා විදේශිකයන්ට කත් අදිමින් තමන්ගේ මඩිය තර කර ගැනීම නොවේ. දේශීය කර්මාන්ත වලපල්ලට යන්නට ඉඩදී තම පුටුව ආරක්ෂා කර විදේශ ආයෝජකයන්ට අවශ්‍ය සියළු දේ ඉටුකර ගැනීමට අවස්ථාව සලසා දෙන්නේ විදේශ ආයෝජකයන්ගෙන් ලැබෙන තුටු පඬුරු සහ විදේශ සංචාර වලට ඇති කෑදරකම නිසාවෙනි.
මෙම නිළධාරියා මෑතකදී පැවති රාජ්‍ය ආයතන නිළධාරීන් සහ කර්මාන්තකරුවන්ගේ රැස්වීමකදී මේ මහා පරිමාණ කැල්සියම් නයිට්රේට් පාවිච්චි කරන විදේශ ආයෝජකයන් ආරක්ෂා කර ගැනීමට මහත් උත්සාහයක් දැරූ අතර මෙම රැස්වීම් වල සිදුවන සියළු දේ එසැනින් විදේශ ආයෝජකයන් වෙත වාර්තා කරමින් විදේශිකයන්ගේ චරපුරුෂයෙකු ලෙසද කටයුතු කෙළේය. රම්‍ය, සුරම්‍ය, සුබ නමින් හඳුන්වන දැවැන්ත මාළිගා 3 කට හිමිකම් කියන මොහු කවදා හෝ විශ්‍රාම යන දිනක විදේශ රටවලද සුවිශල් මන්දිර වලට හිමිකම් කියනු නියතය.
දූෂිත සමන් සහ සමන්
එමෙන්ම වයඹ පරිසර අධිකාරියේ හිටපු සමන් සේනානායක සේම දැනට එම තනතුර දරණ සමන් කුමාර ලේනදූවත් සිදු කරන්නේ විදේශීය ආයෝජකයන් සතුටු කිරීමයි. එම නිසා සමන් සේනානායකට විදේශිකයින්ගෙන් ලැබුනු සන්තෝසම් දැන් ලැබෙන්නේ සමන් කුමාර ලේනදූවටයි. විදේශ ආයෝජකයන්ගේ මෙම සියළු කර්මාන්තශාලා පිහිටුවා ඇත්තේ වයඹ පළාතේ බැවින් සමන් කුමාර ලේනදූව සිතන්නේ වයඹ පලාතේ පරිසරය අයිති තමන්ට බවත් මධ්‍යම පරිසර අධිකාරියට එහි කිසිදු බලයක් නොමැති බවත් වයඹ පළාත තුල මධ්‍යම පරිසර අධිකාරිය බල ශූන්‍ය අධිකාරියක් ලෙසත් ය.
දූෂිත පරිසර ඇමැති
රටේ බොහෝ ආහාර වලට වස විෂ මුසු වී ඇති බව පාර්ලිමේන්තුවේද සාකච්ඡා වන කාලයක ස්වභාවික ජලදහරාවන්ට නයිට්රේට් මිශ්‍ර කරමින් මෙම බහු ජාතික ව්‍යාපාර කරන පරිසර විනාශයට තිත තැබීමට පරිසර ඇමති වන ජනාධිපතිවරයාට මේ වන තුරුත් නොහැකි වී ඇත්තේ මන්දැයි යන්න සියළු දෙනාටම ප්‍රශ්නයකි. ඒ මේ මහා ජාවාරමුන්ගෙන් ඔහුටත් ගානක් කැපෙන නිසාද?
දේශීය ව්‍යාපාරිකයින් නඟා සිටුවීමට යහපාලන රජය ‘එන්ටර්ප්‍රයිස් ශ්‍රී ලංකා’ නමින් වැඩසටහනක් ආරම්භ කර ඇත. නමුත් කොහු සහ කොහුබත් ක්ෂේත්‍රයේ සිටින දේශීය ව්‍යාපාරිකයින් ආරක්ෂා කර ඔවුන් දිරි ගැන්වීමට කිසිදු වැඩපිළිවෙලක් නොමැත. ශ්‍රී ලංකාවේ කොහුබත් සහ කොහු වලට ජාත්‍යන්තරයේ ඇත්තේ ලංකාවේ තේ දල්ලට හා සමාන පිළිගැනීමකි. දේශීය සම්පත්හි අගය නොදත් මිනිසුන් සිටින රටකට විදේශිකයන් ඇදී එන්නේ එම සම්පත්හි අගය හොඳින් දන්නා බැවිනි.
වයඹ ජීවත් වන සාමාන්‍ය පුරවැසියන් පමණක් නොව කර්මාන්තකරුවන් සිය ගණනින් මධ්‍යම පරිසර අධිකාරියට මේ පිළිබඳව පැමිණිලි කළ ද අද වන තුරු ඒ පිළිබඳ ගත් කිසිදු පියවරක් නොමැත. ලංකාවේ පරිසර ප්‍රඥප්තීන් පැවතියද මෙම කර්මාන්තකරුවෝ එය තුට්ටුවකටවත් මායිම් නොකරති. පරිසර ප්‍රඥප්තීන් ලංකාව තුල පුස් ලියවිල්ලක් පමණක්ම වී ඇත.
ජනාධිපතිවරයා මෑතකදී දෙවන වරට අනුරාධපුරයේදී ප්‍රකාශ කර සිටියේ පරිසර විනාශයන්ට අනුබල දෙන නිළධාරීන්ට තරාතිරම නොබලා දඬුවම් කරන බවයි. ඔහු මේ දැවැන්ත පරිසර විනාශය නොදැන සිටින්නට නොහැක. මන්දයත් ශ්‍රී ලංකාවේ පුවත්පත්, විද්‍යුත් මාධ්‍ය සහ පරිසර වේදීන් මේ පිළිබඳව නිරතුරුවම හඬ නගන බැවිනි. විරෝධතා පවත්වති.
රථ වාහන වලට කාබන් බදු ගැසීමට නීති ගෙනෙන රටක, විදුලි කියත් ලියාපදිංචි අනිවාර්යය කරන රටක, වකුගඩු රෝග වලටත් එහා ගිය මාරාන්තික පිළිකා සහ නිල්දරු උපත් වලට හේතු වන ස්වභාවික ජලධාරාවන්ට නයිට්රේට් මිශ්‍ර කරන මෙම දැවැන්ත සෞඛ්‍ය හා පරිසර ව්‍යසනය පිළිබඳව පසු ගිය ආණ්ඩුවේ සෞඛ්‍ය ඇමතිවරයා ද දැනට පරිසර ඇමතිවරයාද ලෙස කටයුතු කරන ජනාධිපතිවරයා කිසිදු දැනීමක් නොමැත්තෙකු සේ හැසිරෙන්නේ කෙසේද?
නිල නොලත් ඝාතකයා සිරිසේන
මේ සියළු දේ සිදුවෙද්දී මෙම දූෂිත නිළධාරීන් මෙම කර්මාන්තකරුවන්ට සියළු පරිසර දූෂණ සිදු කිරීමට ඉඩදී තම මඩිය තර කර ගනිමින් සිටිනුයේ ඔවුන් ජනාධිපතිගේ නියෝග තුට්ටුවකට මායිම් නොකරන නිසාද? නැත්නම් ජනාධිපතිටත් මෙයින් ගානක් යන නිසාද?
මෙසේ මාරාන්තික රසායනික ද්‍රව්‍යයක් ස්වභාවික පරිසරයට මුදා හැරීමට ඉඩදී එම ප්‍රදේශ වල ජීවත් වන අහිංසක ජනතාවට වන හානියට එරෙහිව මේ වනතුරුත් කිසිම ක්‍රියාමාර්ගයක් නොගත් පරිසර ඇමති හා ජනාධිපති ලෙස මෛත්‍රීපාල සිරිසේන ගැන කවදා හෝ ඉතිහාසයේ අඳුරු පරිච්ඡේදයක් ලියැවෙනු නියතය. මේ අසරණ මිනිසුන්ගේ නිල නොලත් ඝාතකයා මෛත්‍රීපාල සිරිසේන කියා එහි සඳහන් වනු ඇත.
මෙම ක්ෂේත්‍රයෙහි දේශීය ව්‍යාපාරිකයින් දිරි ගැන්වීමට මෙම රජය වහාම වැඩ පිළිවෙලක් සැකසිය යුතු වන අතරම කැල්සියම් නයිට්රේට් මේ ක්‍රියාවලියට භාවිත කරන්නේ නම් ඒවා පිරිපහදු කර පරිසරයට මුදා හැරිය නොහැකි නම් භාවිතය සම්පූර්ණයෙන්ම තහනම් කළ යුතුය.
-පාරම්පරික කොහු කර්මාන්තකරුවෙකු විසිනි-
---------------------------
by (2019-03-08 16:44:36)
