කොරෝනා ප්‍රතිඵල වල හරි වැරැද්ද මනින්නේ කව්ද? - තිරේ පිටුපස කතාව මෙන්න..!
විනිවිද ශ්රී ලංකා ලියයි
https://www.lankaenews.com/news/10700/si
Correct-results-LeN-08.05.2020
(ලංකා ඊ නිව්ස් -2020.මැයි.08, ප.ව.4.15) වෛද්‍ය වෘත්තිකයන්ගේ විද්වත් ආයතනය වෙනුවෙන් රවී කුමුදේශ් මහතා පසුගිය 07 වැනිදා, මාධ්‍ය හමුවක් පවත්වනවා. එහිදී ඔහු කියනවා, පසු ගිය දා රටේ කතාබහට ලක්වුන ජාතික රෝහලේ හෙද නිළධාරිනියගේ කොරෝනා වාර්තාවත් එක්ක, ජයවර්ධනපුර විශ්වවිද්‍යාලයෙන් වාර්තා 8ක්, කොළඹ විශ්වවිද්‍යාලයෙන් වාර්තා 4ක් සහ කොතලාවල ආරක්ෂක විශ්වවිද්‍යාලයෙන් 01 වාර්තාවක් ලෙස, කොරෝනා සම්බන්ධයෙන් වැරදි වාර්තා 13ක් නිකුත් වී ඇති බව. ඒ වගේම ඔහු සඳහන් කරනවා, මෙතෙක් සෞඛ්‍ය අමාත්‍යංශෙයෙන් එවැනි එකම වැරදි වාර්තාවක්වත් ලබා දී නැති බවත් අදාල සේවය දෙන්න කැප වූ 200 ක පමණ පිරිසක් ඉන්නා බවත්. කොරෝනා සාම්පල් පරීක්ෂාව පෞද්ගලික ආයතන වලට දීම යට විවිධ කතා පසු ගිය දා තිබුණා. ඒ වගේම කුමුදේශ් මහතා කියනවා හෙල්ත් මිනිස්ට්‍රි එකේ එක කොරෝනා වාර්තාවක්වත් වැරදි නැහැ කියලා (එහෙම කියන්න ඒවා නැවත ටෙස්ට් කරනවද? කියන්න මම දන්නෙ නැහැ ), නමුත් ඔහු කියනවා සමහර නිළධාරීන් වගකීම් පැහැර හරිනවා නම්, ඒ වෙනුවෙන් ඇක්ෂන් ගන්න කියලා. මේ කියන්න යන්නෙ ඒ ගැනවත්, ඔහුගේ කථාව ගැනවත් නෙවෙයි, මේ මෙඩිකල් ටෙස්ට්, එහෙම නැත්නම් වෛද්‍ය රසායනාගාර සේවා වල එයාලත් නොකියන තිරේ පිටුපස පැත්ත ගැන.
ටෙස්ට් නිවැරදියි කියලා ලෝකේ පිළිගන්න නිර්නායකයක් ඇත..
සාමාන්‍යයෙන් වෛද්‍ය රසායනාගාර විතරක් නෙවෙයි ඕනම රසායනගාර ටෙස්ට් එකක් "නිවැරදියි" කියන එක ලෝකේ පිලිගන්න පාවිච්චි කරන නිර්නායකයක් තියෙනවා. ඒ තමයි ඒ ටෙස්ට් එක කරන්න, එම ආයතනය වලංගු තත්ව සහතිකයක් ලබලා තියෙනවද? කියන එක. රසායනාගාර වලට දෙන තත්ව සහතිකය තමයි, ISO-17025 කියන තත්ව සහතිකය. ලංකාවේ මේ තත්ව සහතිකය නිකුත් කරන්නේ, ශ්රී ලංකා ප්‍රතීතන මණ්ඩලය, එහෙම නැත්නම් කවුරුත් දන්න විදියට කිවුවොත් "ස්ලැබ්" ආයතනය. ඉස්සර නම් ඔය විදෙස් රටවල ආයතන විසිනුත් මේ සහතිකය නිකුත් කළා, නමුත් දැන් තත්වය වෙනස් වෙලා.
මාළු කුළුබඩු වලට පමණයි..
මේ ආයතනයෙ වෙබ් එකට ගියොත් (www.slab.lk) ඔයාලට බලාගන්න පුළුවන්, රසායන, යාන්ත්‍රික, විද්‍යුත්, ජෛවීය, ක්‍රමාංකන සහ වෛද්‍ය පරීක්ෂන වලට ලංකාවේ මොන මොන ආයතනද, මේ ISO සහතිකය අරන් තියෙන්නෙ, ඒ මොන මොන පරීක්ෂාවන් සඳහාද කියලා. ඔබ හොඳින් නිරීක්ෂනය කලොත් දකීවි, ලංකාවේ ගොඩක් ආයතන මේ සහතිකය අරන්, ලෝකය පිලිගන්න මට්ටමෙන් අදාල පරීක්ෂාවන් ගොඩක් කරන්නේ, ඇඟළුම්, මාළු, කුළුබඩු වැනි දේ සඳහා පමනයි කියලා. ඇයි එහෙම වෙන්නෙ?
ලංකාවෙ නිෂ්පාදනයක්, යුරෝපයට, ජපානයට, ඇමරිකාවට වගේ යවනවා නම්, අනිවාර්යෙන් ඒක ඒ රටේ ප්‍රමිතියට අදාලද කියන පරීක්ෂාවන් කරලා නිකුත් කරන තත්ව සහතිකය තියෙන්න ඕන. ඒ පරීක්ෂණයට අදාල සහතිකය කොහෙන් හෝ ගත්තා කියලා එයාලා පිළිගන්නෙ නැහැ. ඒක අනිවාර්යෙන් අදාළ පරීක්ෂාව සඳහා ISO තත්ව සහතිකයක් තියෙන විද්‍යාගාරයකින් කරලා තියෙන්න ඕන. ඒ රටවල් තමන්ගේ ජනතාව පාවිච්චි කරන ඇඳුම, කන බොන ආහාර පාන අදාළ ප්‍රමිතියෙන් තියෙනවද කියන එක ගැන බලනවා. විශේෂයෙන් යුරෝපා සංගමය මේ ගැන වඩා සැලකිලිමත්.
ලංකාවටම තියෙන්නෙ ISO කොලිටි ලැබ් 19 යි.. ඒවත් මස් ගම්මිරිස්..
රට යවන ඇඳුමට, සුද්දට කන්න යවන කුළු බඩු ටිකට, මාළු ටිකට තත්ව සහතික තියෙන ලංකාවේ ජනතාවගේ වෛද්‍ය පරීක්ෂාවන් කරන ආයතන වල ප්‍රමිතිය කොහොමද? අතිශය සෝචනීයයි. ස්ලැබ් ආයතනයේ වෙබ් එකට අනුව, මුළු ලංකාවෙන්ම, වෛද්‍ය රසායනාගාර 19 යි, ISO 17025 තත්ව සහතිකය අරන් තියෙන්නෙ. ඒකෙනුත් ජාතික දියවැඩියා මධ්‍යස්ථානය (රාජගිරිය) හැරුන කොට සියල්ලම පෞද්ගලික රෝහල් සහ විද්‍යාගාර. වෛද්‍ය පර්යේෂණ ආයතනය පවා තත්ව සහතිකය අරන් තියෙන්නෙ, මස් සහ ගම්මිරිස් වල යම් පරීක්ෂණ කිහිපයකට පමණයි. එහෙම තියෙද්දි, කුමුදේශ් මහත්තයලා කියන්නෙ කොහොමද? එයාලා කරන පරීක්ෂා නිවැරදියි කියලා.
දැන් ඔවුන්ට සහ මේක බලන අයට කියන්න පුළුවන්, "අපි දවසකට කොච්චර ටෙස්ට් කරනවද? ඕවා කර කර ඉන්න වෙලාවක් නැහැ" කියලා. පොඩ්ඩක් සොයලා බලන්න, පෞද්ගලික රෝහල් වල ලැබ් එකක ඉන්න රසායනාගර සේවකයන් ගනන, දවසකට කරන ටෙස්ට් ගනන. එතකොට සිතා ගන්න පුලුවන්, බැරි කමද? උවමනා නැති කමද? කියන එක. ඒ වගේම වෛද්‍ය ක්ෂෙත්‍රයේ නොවන රජයේ ආයතන වන, කාර්මික තාක්ෂන ආයතනය, රජයේ රස පරීක්ෂන ආයතනය වගේ ආයතන කිහිපයක්, සමහර ටෙස්ට් සඳහා මේ ISO 17025 තත්ව සහතිකය අරන් තියෙනවා. එනිසා කාටවත් කියන්න බැහැ, රජයේ ඒවට ගන්න අමාරුයි වගේ කතා. නමුත් මනුස්සයෙක්ගේ ලෙඩකට රුධිරය හරි සීනි හරි පරීක්ෂා කරනවා කියන්නේ, වැරදි වාර්තාවක් දෙනවා කියන්නේ, ජීවිතය පිළිබඳ ප්‍රශ්නයක්. එහෙම වැරදි දේ නිසා ගොඩක් වෙලාවට ජනයාගේ ජීවිතය අනවශ්‍ය ලෙස බෙහෙත් පාවිච්චි කරන එකේ සිට, මුදල් නාස්ති කරන එකේ සිට, මරණය දක්වා වන ක්‍රියාවලියකින් කෙළවර වන දෙයක් වෙන්න පුළුවන්.
උම්මා දේවිලාට මේවා නොතේරුනාට...
සුද්දට හොඳ දේ කවන්න, හොඳ ඇඳුම් අන්දන්න දඟලන පාලකයන්, නිළධාරින්, ජනතාවගේ මුත්‍ර ටික, ලේ ටික පරීක්ෂා කරන තැන් ටික නිසි ප්‍රමිතියකට ගන්න කටයුතු කරන්න.. අඩුම ගණනේ, වසර 1-2 ක සහන කාලයක් දීලා, මූලික පරීක්ෂාවන් ටික කරන ලැබ් ටිකවත් රට පුරා නිසි ප්‍රමිතියකට ගන්න.
ජනතාව බල්ලො බළල්ලු ගානට දාන්න එපා. උම්මා දේවිලාට මේවා නොතේරුනාට, ඔය උඩ නිළධාරීන්ට මේවා නොතේරෙන්න විදියක් නැහැනේ. "ISO-17025 ලෝගෝ එකක් තියෙන නිසි තත්වයෙන් යුත් වෛද්‍ය රසායනාගාර සහතිකයක්" සඳහා ආණ්ඩුවට, නිළධාරින්ට, නගරයේ රසායනාගාරයට බල කරන්න.
-විනිවිද ශ්රී ලංකා-
මූලාශ්‍ර:
http://slab.lk/AccOrgMedicalClinical.aspx
http://www.mri.gov.lk/wp-content-uploads-2020-02-mri-investigations-03-02-2020-pdf/
---------------------------
by (2020-05-08 10:51:22)
